Ex Mizo National Army General headquarters chuan Aizawl khawpui a Assam Rifles awm mek te sawrkar in an awmna hmun tura a ruat Zokhawsanga hmuna an awmvat theihna turin na taka hmalak an tum tih an sawi.
Vawiina Aizawl Press Club a chanchinbumite hemi chungchanga Ex -Mizo National Army General headquarters hruaituten an kawmna ah Ex MNA President C Zama chuan Aizawl atanga Assam Rifle sawnchhuah a nih ngei theihna turin tun hnaia India President lokal leh Vice President lokal hnenah ngenna an thehlut tih an sawi a, India President chu May ni ruk zingkar ah an hmuhthu sawiin, Ex MNA te chuan an insawn chhuah theihloh chhan Assam Rifle ten chhuanlam an sawi hrang hrang te chu a diklo tih President hnenah hian an thlen tih an sawi a, Ex MNA te hnenah hian President chuan an thu thlente chu awm atih pui thu leh, hemi chungchang ah hian Prime Minister leh Union Home Minister te hmutura a rawn thu Ex MNA te chuan an sawi bawk a ni.
Ex MNA President C Zama chuan kum 1988 April khan AR ground luhna gate bulah civil tlangval thenkhat leh A.R thenkhat an intibuai a, chumi kal zel chuan buaina lian zawk a thlen a. Assam Rifle-te chuan silai chelekin mipui pawisawi lo an pawng kah ta a, mi engemaw zat an kaphlum a, hliam pawh engemawzat an awm a nih kha. Hetih laia Mizoram Chief Minister Pu Laldenga (RIP) chuan Central sawrkarah Aizawl khawpui lailia Assam Rifle awmte chu sawn chhuak turin a ngen a. Mizoram sawrkarin an insawnna tur hmun a zawng nghal a, Zokhawsang chu a lo remchang hlauh a. Zokhawsanga in hmun nei leh huan lo ram neite chu Central sawrkarin compensation a pe a, Assam Rifle awmna tura hmalak nghal a ni. Kum 20 vel kal ta atang khan Assam Rifle engemaw zat chu Zokhawsangah hian an insawn tawh a, battalion Hqrs. leh unit thenkhat chu insawn duh lovin Aizawlah an la awm lui reng a. Kum 2019 Chapchar Kut lawmna AR Ground-a neih a nih khan Chief Minister Pu Zoramthanga’n ‘Kumin May thla hi chuan Assam Rifle-te hi Zokhawsang ramah an insawn tawh ang’ tiin a sawi a, kutbeng thawm pawh a ring hle a a nih kha. May thla a ral a, AR te chu an insawn ta si lo va, mi thenkhatin Chief Minister Pu Zoramthanga chu ‘ dawthei’ tiin an bei zui ta nghe nghe a ni ati. Ex MNA President chuan Ministry of Home Affairs, Union Govt. in DG Assam Rifle Shillong hnenah Aizawla Assam Rifle awmte chu Zokhawsanga insawn tura hriattirin ni 31/5/2019 a Zokhawsanga an insawn thu lehkhaa report turin a hriattir a. Central hruaitu ten Pu Zoramthanga hnenah Aizawla Assam Rifle awmte chu May thla 2019-a Zokhawsanga an insawn tur thu an hrilh bawk a. May thla a ral a, an insawn tak loh avangin Ministry of Home Affairs-in kum 2020 monsoon thlen hma ngeiin Aizawla Assam Rifle awmte chu Aizawl atanga Zokhawsanga insawn turin Lt. General Sukhdeep Sangwan, Director General Assam Rifle Shillong hnenah a hriattir leh a. An hunbi tuk chu March ni 31, 2020 a ni. Chuti chung pawh chuan an la insawn duh ta chuang lo chu hriatthiam har an tih thu an sawi a, Assam Rifle Zokhawsang rama insawn tura tih chungchangah Chief Minister Pu Zoramthanga’n dawt a sawi ang lek lek a thuchhuah awm thin pawh lehkha ziak ngeia awm a nih avangin Chief Minister hian dawt a sawilo tih Ex MNA President chuan a sawi a ni.
Central sawrkar in a thupek a hlenchhuah loh vanga insawn lo an ni zawk a nih thu EX MNA te chuan sawiin Zokhawsanga AR insawnna turah hian kawng tha taka siam zawh a ni tawh a, Power pawh bun fel vek ni tawhin Water Supply pawh tihfel vek a ni a. Chenna tur in (building) pawh an mawmawh zat chu sak zawh vek tawh niin chenna tura peih fel vek a ni tawh niin EX MNA te chuan an sawia, Aizawal atanga insawn tura thupek awm reng chunga Aizawl atanga an insawn duh lo hi Ex- MNA Assn. General Hqrs. chuan tha a ti lo va, an chhuah hma chuan a nawr zel an tum tih EX MNA President chuan a sawi a ni.
