Assembly Budget Session kal mekah Thawhlehni-a Miriam Lalnunsiami, National Games neihnaa inhliam tanpuina pek chungchangah Sports Minister, Robert Romawia Royte leh Opposition Group Leader, Lalduhoma te thu inhmuh lohna leh, inhnialna thu kal zelah Assembly House Speaker Lalrinliana Sailo chuan vawiin khan thudik hailang.
Hemi chungchangah hian MNF Party chuan, “Speaker-in a dik lo zawkin ngaihdam dil tura a tih angin, vawiin ni 22 February, 2023 (Nilaini) hian thudik hailan a ni ta a. Lalduhoma, Serchhip bialtu, ZPM MLA chuan a dik lo zawk a ni tih pawmin, Assembly House zahawm takah ngaihdam a dil a. Mizoram rorelna in sang berah thudik lo a sawi chiang ngei tih hailan a ni hi MNF chuan zahthlak a ti takzet a, thudik hailan a ni erawh lawmawm a ti hle thung.
“Pu Lalduhoma’n tun tum Session-ah Sports department hmalakna chungchanga thudik lo a sawite zingah PMJVK Scheme-ah Sports Department-in a guidelines kalhin sum hmu teuh teuh angin a sawi a. Thudik chu PMJVK Guideline ang thlapin Mizoram sports leh thalaite tan Fund pek a ni. Sports Department-in UD&PA sum pawt penga Sports atana hmang angin Assembly House-ah a sawi pawh hi thudik lo a ni a. UD&PA-in Urban Infrastructure a siam zingah Sports Infrastructure a siam zawk a ni tih hi Mizo mipuiin hria se MNF chuan a duh hle.
“Hetianga thu dik lo, lang chhuak leh mai turah pawh thih ngam lupu meuha Pu Lalduhoma a tang ngam khan a zia dik tak a pholang chiang hleah kan ngai a. Thudik ziktluak lo leh belhchian dawl lo, tun hma atanga a chin than, thudik hrula dawt a sawi tam thinzia leh a inzir peihlohzia a tilang chiang hleah MNF chuan a ngai,” an ti.
MNF chuan, “Sorkarna siam tura beiseina nei ve thin Opposition Group Leader ni mek, Chief Ministerial Candidate hial lo ni tawh Pu Lalduhoma hian kum 1980 hun lai vel ang maiin, political propaganda mawl mang te te hmanga mipui bum a tum reng mai hi MNF chuan sim tawh se a duh takzet a. Pu Lalduhoma thusawi leh ui bengah hlin tur a awm ngai lo tih hi Zoram mipui hian lo hria se tih MNF chuan a duh takzet a ni.
“Infiamna lama tui mite politics hmanrua a hmang a, hamthatna um vanga thudik lo ngial ngan lutuk lo hman tangkai tum hi a ram hmangaih lohzia hle a, lal chak lutuk avang a khua pawh hmu tawh lo, ZPM Party hian thudik lo sawi hi bansan tawh turin MNF chuan a chah nghal a ni.
“Assembly House zahawmna humhim tura Speaker, Pu Lalrinliana Sailo hmalakna leh huaisen taka Assembly House-ah Sports Minister Pu Robert Romawia Royte-in thudik a tan ngam hi MNF chuan a chhuang takzet a. Chief Minister Pu Zoramthanga House Leader, Minister-te leh rulling MLA-te Assembly House-a an chet dan hi MNF chuan puitlin thlak a tiin a chhuang takzet a ni,” MNF chuan an thuchhuahah chuan an ti bawk.
