“Mizoram Legislative Assembly Session neih zawh takah khan Chief Minister Pu Zoramthanga ‘demand’ sawi ni, March ni 9, 2022 chawhnu lamah khan ZPM MLA leh an Group Leader ni bawk Pu Lalduhoma khan ‘Sem Policy’ a sawisel dan a zawng nasa hle a ni,” tiin Congress Thalai chuan thu chhuah a siam.
Thuchhuahah chuan, “Pu Lalduhoma hian, ‘Kum 2008-ah kan inthlang leh a, Congress-ten MNF sing nga hi kan lan loh chuan an ti leh a, NLUP kha hming thar vuahin NEDP an ti a, nuai khat sem an rawn zuar ve leh a, kum sawm an sorkarpui leh a,’ tiin Mizorama rorelna sang ber Assembly House-ah meuh thudik lo a sawi ngam. Congress party hian ‘MNF MIP sing nga hi kan lan loh chuan,’ tiin kan sawi ngai lo, NLUP hming thar hi NEDP tiin a vuah ngai hek lo. NEDP hi NLUP kal zel aṭanga lo piang niin kum 2016 aṭanga kalpui chauh a ni. Hetiang taka mipui hma leh Assembly House meuh pawh zah lova thudik lo sawitu ZPM Leader Pu Lalduhoma hian ngaihdam dil rawh se,”
“Synod Social Front-ten NLUP an zirchianna, a kum leh a hun chhung dik taka sawi lang duh si lova mipui bum nana thu lak nana a hmang pawh hi a pawi kan ti takzet, Pu Lalduhoma hian March ni 9, 2022-a sem chungchang Assembly House-a a sawi zelnaah, “Chumi chungchangah chuan Synod Social Front-in zirchianna a nei ta a, chu Synod-ina a hmuh dan chu ka’n sawi ang a, ‘hemi kum’ chhung hian chhungkua pasarih (7) chauhvin cheng nuai khat an dawng,” tiin a sawi chhunzawm a, ‘hemi kum’ a tih hi eng kum leh eng hun chhung nge tih hi kan zawt lêt a ni. NLUP hi dawngtu tam tak : DTP, Petty Trade, Auto Rickshaw leh a dangte phei chuan a hlawmin nuai khat aia tam ten an dawng a nih kha.
“Synod Social Front-in khaw 10 aṭanga NLUP dawngtu chhungkaw 300 te April – July, 2012 chhunga zirchianna a neiha an hmuhchhuahah chuan – NLUP dawngtu 10.3% chu eng political party maha inziahluhna nei lo an ni a, NLUP sem chungchangah party induhsak bikna awm lo nia hria 73.6% an ni a, Trade thlan chungchangah 70.6% ten mahni duhzawng trade an thlan laiin 29.3% te chu sorkar/mawhphurtu ten an thlansak an ni.
“NLUP hian Mizoram pum a dap hneh hle a, Mizoramah hian kum 2011 chhiarpuiah chhungkua 2,21,077 awmin, kum 2017 April thla thleng khan chhungkaw 1,30,229 lai NLUP hian a tuam hman. Kum 2016 base line survey-ah khan Mizoramah BPL chhungkua 56,584 an awm bawk.
“Congress sorkar lai khan Prime Minister Chairman nihna Cabinet Committee on Economic Affairs (CCEA)-in NLUP atan cheng vaibelchhe 2873.13 min pe a, Congress sorkar-in State leiba tipung lovin hneh takin NLUP kha a kalpui a ni.
“Congress sorkar laia Pu Lalsawta’n Finance a enkawl lai, NLUP hneh taka kalpui a nih lai pawh khan Finance Commission-in Fiscal Deficit Rate 3% hnuai lam chin a him a tih laiin Mizoram chu him tak, 1.59% te, 1.81%-ahte kan awm thei a ni. Budget aṭanga leiba nei mang lo chungin sum renchem takin NLUP sem a ni a, sorkar hnathawk hlawh leh GP Fund pawh pek reng a ni. Tun MNF sorkar kum 2020-ah khan Fiscal Deficit Rate hi a him chin 3% aia a lêt thawka sang 6.87% te a nih tak avangin hlawh pek tur-ahte an buai ta a ni.
“Kum 2022 Assembly Budget Session-a NLUP te, SEDP te sawisel chiamtu ZPM MLA Pu Lalduhoma hian kum 2010 khan AMC inthlan campaign kick off-naah, ZNP hotu ber a nih laiin NLUP kha nasa taka fakin, “Congress thawhpui kan châkna chhan chu NLUP hi a ni…” a ti hial a nih kha. Hei hian mize nghet a neih lohzia a pholang chiang hle.
“Mizorama kan kalphung (system) siamṭhat nana nasa taka ngaihtuahna sengtu MPCC President Pu Lalsawta lehkhabu ziak ‘Ṭhat Loh Theih Lohna Bawm,’ chu Pu Lalduhoma bawk hian a engamah hmain a sawisel leh ta chiam mai hi a mak hle. ‘Bawm ruak hi eng tihna mah a ni lo’ titu Lalduhoma hian Mizoram tan hian sawhthing bak hi a hmu phak meuh emaw ni le, amah hi khawi bawmah mah awm thei loa tlanchhuak zel, mi nghet lo leh thudik loa midang sawisel lama ‘talent’ nei ṭha em em mai chauh a ni.
“Ṭhat tum reng reng lohna bawma awm mek te, Ṭha lutuk leh hre lutuk bika inngaihna bawma awm mekte an awm a. Congress Party hi ṭha ber leh fel ber angin kan insawi ngai lo va, hmasawn ngai, inzir reng ngai leh famkim lohna nei kan ni tih kan inhriat avangin, ‘Ṭhat Loh Theih Lohna Bawm’ kan thupui a ni. Chu Ṭhat Loh Theih Lohna Bawm (System) hmang chuan kan hnatlangho ang a, sorkar ṭha kan din dawn zawk a ni. Congress Party chuan mi harsa zawkte leh rahbi tleu tawhte dâwm kân hi a ngai pawimawh a, an tan theihtawp chhuahin hma kan la zel ang. Heng mite leh ṭangte ṭanpuina hi kan thupui a ni,” tiin thuchhuahah chuan a tarlang bawk.
