Centre for Environment and Social Justice (CESJ), Mizoram chuan
Assembly Speaker Bungalow a thingkih anih chungchangah Aizawl DFO hnenah action la turin an thlen.
CESJ chuan, “Tunlai khawvelah Environment pawimawh zia leh kan thing leh mau humhalh pawimawhna nasa takin Awarness kan kalpui lai leh mitinin rammgaw pawimawh zia kan hriat thar mek laiin, a humhalh leh vênhim kawnga uar zâwka hmala tur ber Sawrkarin, Sawrkar hmun pawimawh laia thing an kih tîr mai hi Dan pal zutna leh dan zawmlohna lian takah kan ngai a.
“Thingkung hi mihring tana hnawksak leh hlauhawm a awm ve thei. Mizoram sawrkarin hetiang thing kih dan tur hi a duang fel hle a, forest land leh non forest land-a mi kih dan tur mai bakah municipal area chhunga thing kih theih dan pawh a hranpa ngatin dan siam a ni a. Heng Mizoram Assembly dan siamte hi Governor hriatpuina thlapin Gazette-ah pawh tih chhuah a ni.
“Hetiang a nih laia Mizoram Assembly Speaker chenna, a private in pawh ni lo kawta dan bawhchhiaa thing an kit hi thil dik lo tawp a ni. CESJ chuan sawi mam tum chi ah kan ngai lo.
“Mipui leh sawrkar department te ngei pawh tree felling guidelines bawhchhiat avanga hrem ṭhin an nih laia, hetianga dan bawhchhiatna thlenna hmun hi a dan siamtute zingah pawh an Speaker quarter kawt a ni leh zel hi Dan pawisak lohna lian takah CESJ chuan angai a.
“Ram hruaituten an dan siam an palzut a, mipuite hremna atan chauh hman an tum a nih chuan a fel lo hle ah kan ngai a ni.
“Heng te a nih vang hian CESJ chuan Vawiin Ni.04.June.2024 khan DFO Aizawl hnehah hmala tûra ngenna kan theh lut a. Hmalakna kan hmu lo a nih chuan PIL file leh amawhphurtu EF&CC Department thlengin kan khing tel ngei dawn a ni,” tiin vawiin khan thuchhuah an siam.
