Vawiin tlai khan Mizoram rawn tlawh mek tu Australian Senator Dean Smith chuan Larsap Hari Babu Kambhampati chu Raj Bhavan-ah a kawm.
Larsap Hari Babu Kambhampati chuan a khualzahawm chu Mizoramah a lo lawm a. Mizoram a rawn tlawh chhan te a zawt nghal bawk a ni. Larsap leh Australian Senator inkawmnaah hian Mizoram dinhmun leh hmalakna te an sawi dun a. India leh Australia te inlaichinna chu tun hnaiah nasa takin hma a sawn tih an sawi a. In sumdawntawnna bakah kawng hrang hrangah an in thianthatna hi ti ngheh a ni mek zel tih an sawi dun a ni.
Senator Dean Smith hian Mizoram a rawn tlawhchhan pawimawh tak pakhat chu Myanmar raltlan te chungchang a ni tih a sawi a. Mizoram sawrkarin engtin nge hma a lak tih te bakah refugee te ngaihsak an ni em tih te a zawt a ni. Governor Hari Babu Kambhampati chuan Myanmar sawrkar sipai thuneihna hmanga paihthlak a nih hnuah Mizoram hmun hrang hrangah raltlan te an rawn lut a. Hei hi humanitarian ground angin khap emaw dan a ni lova. Raltlan tam tak te hi Chin state a Mizo hnahthalak te an nih thu sawiin Mizoram mipui ten an theih anga tha in an lo chhawmdawl a. Sawrkar pawhin thil tul bikah chuan hma a la thin a ni a ti.
Senator Dean Smith chuan Mizo te leh Chin state a cheng te chu unau an ni tih a lo hriat thu a sawi a. Australia ah Chin state mite tam tak an awm mek thu te leh Australia sawrkarin a ngaihsak thu te a sawi a. Myanmar mipui sawrkar sipai thuneihna hmanga paih a nih tak avanga mipui tawrhna chu Australia sawrkar chuan pawi a tih thu te sawiin Myanmar sawrkar thiltih dan pawh uluk takin a thli thlai mek a. India chu thian tha a nih anga Myanmar raltlante tha taka lo enkawl turin a ngen a ni.
Senator Dean Smith hian nimin vek khan Chief Minister Zoramthanga chu a pisa ah hmu in an inkawm. Dean Smith hi State Planning Board Vice-chairman H. Rammawi chuan a tawiawm a ni.
