Auto Rickshaw-a Fare meter vuah dodal dawn

Aizawl 21st July, 2022 : All Mizoram Auto Rickshaw Owner Association-in Auto Rickshaw-a Fare meter vuah tura Sorkar thupek chu an dodal tih an sawi.
Mizoram hmun hrang hranga Auto Rickshaw neitute hian vawiin khan Berawtlang-a Science Centre Auditorium-ah joint meeting an nei a, tun thla ni 7-a Mizoram sorkar-in meter vuah tura hriattirna a tichhuak chu an dodal tih an sawi a. He hriattirna hi August thla ral hma ngeia sut leh turin Mizoram Sorkar an ngen tih an sawi.
Rickshaw neitute hian Mizoram chu tlangram a nih avangin kawng chhuk chho tak tak a tam a, kawng chhe tak tak a tam bawk avangin Sorkar Rate siam angin tlan ngaihna a awm lo a ni an ti a. Sumdawnna lirthei dangah Fare Metre vuah tura tih a nih loh laia Auto Rickshaw-ah chauh vuahtir tum a nih chu inthliarna ni-a an ngaih thu an sawi.