PC Party chuan thuchhuah siamin, “June ni 16, 2022 Awmpuite Ni (International Domestic Workers day) a lo thlen hian PC Party chuan awmpui chhawrtu leh awmpui nei zawng zawngte chibai kan buk a. Mihring nun changkang leh danglam chho zel avangin awmpui (Domestic Worker) mamawhna a sang zel a, chutih rualin eizawnna hna vang zel avangin mi awmpui ni a inhlawh duh an pung zel bawk a. Hemi chungchangah hian sawrkarin ngaihtuahna thar a hman a ngai PC Party chuan kan ti takzet a ni,” an ti.
Thuchhuahah chuan, “Awmpui hna hi sawrkarin awmze neia a kalpui chuan a chhawrtu leh a thawktu tan thil ṭha tak a ni a. Sawrkarin a ngaihsak lo va, awmze neia a kalpui loh erawh chuan diklo taka inrahbehna chi hrang hrang a awm ṭhin a. Mizoramah pawh awmpui rahbehna chi hrang hrang a thleng nasa em em a. Hemi harsatna ti reh tur leh awmze nei a in awmpui hi kan kalpui theih nana hmalak hi sawrkar mawhphurhna liau liau ah PC Party chuan kan ngai. Vawiin aṭanga awmpui neitu leh awmpuite awmze neia an inchhawr theihna tur leh an him zawkna tura hma la turin PC Party chuan Mizoram sawrkar kan ngen a ni,” an ti bawk.
