Awmpui hnawthawk intelkhawm ten an dikna chanvo humhalh an duh

Ferrando Domestic Workers Alliance (FDWA), North East-a Awmpui hnathawktu intelkhawm, Aizawl City Member ten Aizawl ah Silent Demonstration leh Leaflet Campaign an nei.
Ferrando Domestic Workers Alliance (FDWA), North East ten vawiina Aizawl hmun hrang hranga an hmannaah June ni 16 hi khawvel pumah Awmpuite ni, International Domestic Workers Day a ni a, FDWA te hian kum tinin hemi ni pual hian North East Domestic Workers Week, June ni 10 atanga ni 16 thlengin an lo hmang tawh thin tih an thuchhuah ah tarlangin.
Kuminah hian Aizawla an la tih ngailoh Placard Campaign, Silent Demonstration neiin Aizawla Awmpui hnathawktute leh FDWA hruaituten he hun hi an buatsaih a ni.
FDWA te hian kumina an thupui, “Hna duhawm leh Nun zahawm zawk- Covid19 hnulamah” tih hmang hian Radio ah discussion te pawh an lo nei tawh a, Signature campaign te pawh an la nei leh dawn a ni.
Mizo ten Awmpui hna kan lo hlut lehzuala, an dikna chanvo humhim a nih theih nan thuziak hrang hrang an buatsaih a ni. Domestic Worker te tan Nun zahawm leh HNA duhawm kan siamsak thei tih te, Domestic Worker te Dikna leh Chanvo humhim sak hi mitin mawhphurhna a ni tih te, Hnathawhna hmun him hi hnathawktu chanvo a ni tih te, Mi tam tak hnathawka an chhuah theihna chhan chu Domestic Worker te vang a ni tih te, I in hi ka hnathawhna hmun, ka office ve a ni tih te, Ram hmasawnna atana thawktu pawimawh tak chu Domestic Worker te hi an ni tih te, Hnathawktu kan ni, Sal kan ni lo tih te, Rinawm leh taima taka hnathawh hi hnathawktu mawhphurhna a ni a, hnathawktu dikna chanvo zah sak hi a ruaitu mawhphurhna a ni tih te chu an campaign au hla langsar zual deuh te a ni.
FDWA hruaitute hian Aizawla Awmpui hnathawktu, he pawla la tel velo te pawh lo tel zel tur hian an sawm a, in lungruala, thu khat vuaa a ruaitu te leh a thawktuten hamthatna an lo hmuh zel theih nan thawhpuiah an sawm a ni. Tin, FDWA Aizawl te hian Awmpuihna hi hna tha leh zahawm a lo nih zel theih nan theihtawpin hma an la reng a, in rawih dan mumal taka in ruai a, mimal dikna chanvo inrahbehsak tawn lova, NGO kaltlanga inruai thin turin a ruaitu leh thawktu te pawh an ngen tih an thuchhuah ah an tarlang a ni.