Bangladesh atanga raltlante semdarh an ni dawn

Lawngtlai district Parva-III khua a Bangladesh atanga raltlan 310 awm mekte chu vawiin atang hian hmun dangah sem darh an ni dawn.
Hemi chungchanga tunhnai a Lawngtlai bawrhsap Marilyn Rualzakhumi hova district disaster management authority thukhawm chuan ruahmanna an siam a. Thawhkhatnaah, vawiin leh naktuk-ah Tuithumhnar leh a bul hnai khuaah chhungkaw 30 dah an ni ang a. Chhungkaw 20 chu Vathuampui-ah dah chhungkaw 14 chu Chamdur project-ah dah an ni ang a, chhungkaw 10 chu Mautlang khua-ah dah an ni ang. Chhungkaw 64 dahna tur Tuithumhnar, Vathuampui leh Chamdur project-te hi Lai Autonomous District Council huam chhung a ni a, Mautlang hi chu Lunglei district a ni thung a. Tuna an awm mekna Vapar-III khua hi Chakma Autonomous District Council huamchhunga awm a ni thung.
An inhuam thu an sawi angin BSF mite’n raltlan sawnchhuah turte tan lirthei an ruahman ang a. Chawngte SDO (Civil) chuan Parva-III a raltlan chhawmdawlna awmte enfiahin an insawnna tur hmunah an mamawh tur angte a suan bawk ang. Parva a tlawmngai pawlte chu hetianga raltlan sawn chhuah a nih dan tur hi hriattir an ni ang. An insawnna tur khua a VCP leh tlawmngai pawlte chu raltlante lo hmuak turin ngen an ni bawk.
An insawnna tura VCP leh Young Lai Association (YMA) hruaitute chu Village Level Committee on Bangladeshi Asylum Seekers din theuh tura hriattir an ni.