Vawiin November 10, 2022 chawhnu dar 1:00 khan Baptist Church of Mizoram, Central Church, Upper Republic, Aizawl ami chu bialtu Pastor Rev.T.Lalsangvunga’n a hawng.
BCM Central Church hi Aizawl Town Baptist Church tiin 10.11.1985 khan a lo ding a, mi tam ber hriat awlsam dan chuan Town Church tih a ni a, Upper Republic Veng Aizawl a awm a ni. Aizawla Baptist Kohhran hmasa ber a ni a. Kum 23 chhung hming a lo put Town Baptist Church tih chu BCM Central Church tiin 27.12.2008 khan thlak a ni ta a ni.
Aizawla Baptist Kohhran a din tirh hian mi 800 vel ni a ngaih a ni a, Central Church ah hian member tam lai ber in member 2000 dawn an ni. He Kohhran atang hian Kohhran 6 a indang tawh a, tuna Aizawl khawpui chhunga Baptist Kohhran 55 te hi BCM Central Church fa hrin, hrin leh chhawng zel an ni tlangpui.
Biak In hi a dung 106ft leh a vang 45ft a ni a, Vawiina BCM Biak In hawn thar ah hian Kohhran Hall, Sande Sikul Hall, Kohhran Committee room, Meeting Hall, Office, Vestry, Baptistry, Jam room leh recording room te a awm tel a. A sakna atan hian Rs.51,748,173 sen ral a ni a, la thuam belh zel tur a ni.
Tun dinhmun ah hian member mi 883 an lawi mek a, mipa 407 leh hmeichhi 476 an ni. Heng zingah hian Pastor leh Minister 5, Kohhran Upa 16 leh Rawngbawltu 13 an awm.
