Aizawl Garbage Truck Owners’ Association (AGVOA), PPP Mode Bawlhhlawh Paih Welfare leh Sanitation Driver & Handyman Associatioan (SD&HA) te chuan bawlhhlawh paih motor hman man (rate) rualkhai leh mumal zawk a, veng tin hlat dan mil zel a siam tha turin AMC-a hotute hnenah vawi engngemaw zat an lo thlen tawh tawh tih sawiin, AGVOA chuan, “October ni 25, 2019 atang khan Bawlhhlawh paih motor hman man siam tha tur hian lehkhain vawi 8 lai kan lo thlen tawh a. Hei bakah hian PPP Mode Bawlhhlawh Paih Welfare-te pawhin bawlhhlawh paih motor hman man siam tha tura ngenna vawi engngemaw zat an lo thlen tawh bawk a. Chuti chung chuan vawiin ni thlengin bawlhhlawh paih motor hman man veng hrang hrang hlat dan mil pawh nilo, per kilometre-a chhuta rate inanglo tak mai kan la hmang mek a, hetiang taka bawlhhlawh paih motor hman man a mumal loh avang hian lungrual taka hmalak pawh a har khawp mai a.
“Motor enkawlna senso lo sang zel bawk nen, rate mumallo tuartu te tan chuan a beidawnthlak tawh em avangin Bawlhlawh paih motor zawng zawng ding a, rate siam tha tura nawrh hial a lo ngai ta hi a lungchhiatthlak hle a ni,” tiin “Aizawl khawpui chhung mipui bawlhhlawh khawntute chuan Dt. 23.09.2024 (Thawhtanni) atang khian Tiam chin awmlo va din vek tur kan ti ta a ni,” an ti.
