Bazarpui chungchanga UD&PA Deptt. thuchhuah

New Market Building sak that tur hi Aizawl Smart City hnuaia thawh tur niin a project hming chu “Modernisation of Bara Bazaar – Trade Facility-cum-Exhibition Areas” tih a ni a. Aizawl Bazarpui sak thar tur design siam tur hian intihsiakna buatsaih a ni a, uluk taka endik a nih hnuah Catalyst Architecture thlan an ni. A sak dan tur design an thehluh chu uluk taka endik a nih hnuah Aizawl Bazarpui building sakna tura sum ruahmanin a daih dawn lo tih hriatchhuah a ni a, chumi siam rem tur chuan Aizawl Smart City Ltd. leh Project Management Consultant (PMC) leh Catalyst Architecture te nen meeting neiin estimate chu en that leh a ni.
Aizawl Bazar hi Commerce & Industries Department te enkawl a nia, anni nen hian Aizawl Smart City Limited chu an inberawn reng a, thutna (seat) awm tur zatte vawi engemaw zah tihdanglam a nih avangin DPR final chhung hian hun a duh viau a. Vawi engemawzah sawi ho a nih hnuah DPR amount hi Rs. 42.83 Cr-ah siam a ni ta a, heti zat sum hmang tur hian Mizoram sorkar chuan March 2022 khan Approval a pe a ni. Aizawl Bazarpui sak turah hian a hnuaia facilities te hi awm tura ruahman a ni.
1. Seat awm tur zawng zawng : 1105
(a) Chawhmeh Dawr – 449
(b)Thingpui Dawr – 15
(c) Nepnawi Dawr – 183
(d)Thawmhnaw Dawr – 206
(e) Secondhand Dawr – 252
2. Motor Parking, Light vehicle 31 leh Two wheeler 79 dah theihna tur siam a ni ang.
3. Lift, Mihring veivahna tur leh bungraw thiar kualna tur a hrana siam a ni ang.
4. Cold Storage 5. CCTV Cameras
6. ATM Booth 7. Food Court
8. Market Office 9. Mini Conference Room.
Project hnathawh hi a hmanhmawhthlak tawh avangin chak zawka hna thawh a nih theih nan a thawk thei tur Contractor thlank awngah Aizawl Smart City Limited chu a fimkhur hle a. Restricted Tender chhuah a nih hnuah he hna atan hian Technical leh Financial Bid hi Firm pathum (3) hnen atanga dawn niin, Aizawl Smart City Ltd hnuaia Bid Evaluation Committee (BEC) chuan uluk taka a en dik vek hnuah a chhang hniam ber (Lowest bidder L1), Lushai Engineers hnenah Letter of Acceptance (LoA) chu ni 22.9.2022 khan pek a ni. Lushai Engineers te hian Performance Security an thehluh veleh Contract Agreement sign a ni ang a, hna pawh tan nghal a ni ang.