Lunglei District Congress Committee (LDCC) chuan thuchhuah siamin, “Mizoram Sorkar in NABARD Loan hmanga Mizorama School engemawzah a sak zingah thil fello tamtak a awm tih media hrang hrang a tarlan a nih hnuah Baptist Higher Secondary School(BHSS) Administrative Building Lunglei Serkawn a sak mekah Rs Nuai 26 chu a bo ve leh ta,” an ti.
Thuchhuahah chuan, “Congress sorkar lai khan School sak that tur zingah BHSS hi telh a niin estimate Rs Nuai 80 ruahman a ni a, mahse Sorkar thar,MNF kaihhruai a lo piang a, Rs nuai 78 ah tla thla in Contractor hnenah pek a ni. BCM hotu te chuan Contractor kutah pek a nih chuan tha vak lo a sak an hlauh avangin Kohhran kutah dah mai turin Education Minister Pu Lalchhandama hi an ngen a, mahse a hlawhtling lo.
“Lunglei lama an party worker te pawhin sa ve ngeise thil awmlo a ni hran lo . Mahse, Education Minister hian sum siam a tum tlat avangin Allied Consultancy firm hming hawhin an ni hian party worker/contractor hnenah Rs nuai 52 in sa turin an ti a, Rs nuai 26 chu an chheprelh ta tihna a ni . Contractor hian Rs Nuai 15 hauhin Rs Nuai 37 in BCM hian anmahnin sa mai se tiin Administrative block sak nan hian hlan an tum ta a ni.
“BCM chuan hei hi a hnawl a, hnawl a nih hnuah Education Minister leh a naute hian Rs Nuai 42 sing 4 sang 6,88 in BCM chuan sa mai turin an tih bakah an rawihchhawn party worker/contractor chu Earth work senso pawh pe turin an ti leh a, an share dahthat Rs nuai 26 chu an dahtha khiau a nih hmel.
“Tihngaihna dang a awm tak loh avangin BCM chuan Building sak hna chu a koah dahin sorkar pawisa in a daih bak chu Kohhran pawisa a chhunzawm mai nise an ti ta a ni.
“BCM hian Kum 2021, September thla tawp atang khan a sa tan ta a, tunah chuan a tam zawk sak zawh tawh a ni.
Estimate zat Rs Nuai 78 atangin Rs nuai 10 hi Contractor hi pek a ni a, Rs nuai 68 la awm atangin Rs Nuai 42 leh tlem(42, 46,088/-) BCM kutah hlan a ni. Abak Rs Nuai 26 hi Education Minister Pu Lalchhandama Ralte hian a awmna a hre ngeiah kan ring a, khawiah nge a chheprelh?,” an ti a.
“Hetianga Kohhran hming a thil tih naah lehzel Mizoram Sorkar,MNF kaihhruaiin sum ti pelhe a,sum siam nan a hmang ngam hi LDCC chuan rapthlak a tiin thalo a ti takzet a, Mizorama Kohhran lian ber dawttu BCM chantur pawh chhuhsak duhtu Education Minister Pu Lalchhandama hi a mawhphurtu diktakah kan ngai a, a aihnahphahpui Allied Consultancy firm nen hian inthurual a an thil tih hi Lunglei mipui leh BCM kohhran pawh an zah lohna diktak a ni. Kohhran chanvo ei sak then duhtu hi minister anihna atangin bang ngei turin LDCC chuan a phut tlat a ni. BCM Sikul sakna tur Rs Nuai 26 an chheprelh hi September 2022 chhung ngei a pe let turin kan hriattir a ni. An eiru mai pawh ni lovin an ei lang tawh a, hetiang mi hi Minister ni zui zel tlakah kan ngai lova, bang rawhse tih hi kan ngaihdan a ni.
“Hetihlai hian BCM thuneitu lamin an sum dawn ang ang tangkai tak a hmang a, building tha tak an sa mek zel hi LDCC chuan lawmawm a ti takzet a ni,” an ti bawk.
