BD Chakma MLA atanga bantum lo, Court sang zawka kaltum

Aizawl July 27 : Eiruk thubuaia Special Judge (PC ACT) in thiamloh a chantir, MLA Dr.BD Chakma chuan thuthar lakhawmtute hmaah sum hman dan chungchang a sawifiah a. Court sang zawka kal a tum thu a sawi bawk a ni
MLA Dr.BD Chakma chuan Autonomous District Council pathumte tana fund dawn tur chu installment in thla 4 danah an dawn thin thu a sawi a. Hetiang anih avang hian Autonomous District Council hnuaia thawktuten hlawh an lak that theihloh thusawiin harsatna an tawk thin niin a sawi.
Thawktute mamawhna a san avang leh an nawrna avangin Executive Secretary hnen atanga hlawh lo lak lawk thin chu an tih theih awmchhun a ni tiin Dr. BD Chakma chuan hetianga hlawh lak lawk hi harsatna inhriatthiam tawnna nen kalpui a nih thu a sawi a. An ba zawng zawng pawh an rulh tawh thu a sawi a ni.
Hei bakah hian Dr.BD Chakma chuan Executive Secretary phalna ngeia hlawh la lawk annih avang leh, dan kalh anilo tih Executive Secretary in a sawi bawk avangin intihluihna a awmlo a ti a. Thubuai chungchangah hian hlawh anlo lak lawk chu an rulh leh thu leh a mawhphurtutur diktakin an phur lo tiin thutlukna hi an pawlo tih a sawiin, thubuai leh court in thiam loh a chantir chungchangah court sang zawk kal a tum zel thu a sawi a. Chumi tur chuan hmalakna pawh a awm mek tiin MLA atanga ban a nih leh nihloh tur chungchangah Assembly Speaker chu rorel thiam tak a nih avangin dik takin rorel mai ang, a ti bawk.
Court in hremna puan a ah hian, thiamloh chantir mi 13 te chu kum 1 chhung LungIn tang tur leh Rs.10,000 theuh chawi tura tih an nih laiin, ni 90 chhung atan bail a chhuah lailawk an ni a, chumi atan chuan cheng sing 2 20,000 theuh chawitir an ni.