Aizawl, 19th June, 2023: Vawiin thawhtannni khan ZPM chuan chhung inkhawm hun an hmang a, he huna thusawitu VL Zaithanzama, MLA chuan, “Ram veitu mi thahnemngai, mithiam leh thlir zau tak takte rumna leh au awin kan ram hruaitute a tiharh zo lova, hre reng chunga muhil der, ben harh zawh loh an nih avangin kan thlak thuai dawn a ni,” a ti.
Aizawl West III bialtu MLA VL Zaithanzama chuan, “Kalphung tharah chuan kan hrawn tawh sawrkarte’n sum sem a, mipuite thatchhiat zirtir a, intodelh kan hlat tial tial ang hi kan ti ve dawn lova, mipuite taimak kan zirtir ve thung dawn a ni. Mi taima an kang ang a, hnathawhin awmzia a nei ang. Mi thatchhia leh pamhamte’n hmuhsit an hlawh tial tial dawn a, eiru leh kut tling lova sum late kan bitum dawn a. Ram hnufual leh hmasawn thei lo ram a piangah eirukna a hluar thin an tih angin, kan ram pawh kan hmasawn theih loh dan han thlir hian zep tur a awm lo. Thenkhat chuan ramin sum an siam a, an hausa thur thur a, keini erawh kan hmuh chhun chu engzat pawh nise dik takin mipuite chanvo tur kan siamsak dawn a ni. Sawichhuah hnem leh thawhchhuah hnem aiin kan hman dan a dik em, tihte, kan thiltih chu eng ang taka tangkai nge, Mipuiin engtin nge a zar an zo, tih hi kan ngai pawimawh dawn a ni,” a ti.
Vl Zaithanzama chuan, “Kum 35 chuang MNF leh Congress-in ram an lo siam tawh a, an thlen chin kan hmu. Engmah thawk lovah kan puh hauh lova, mahse an thawhchin erawh a lungawi thlak loh a ni. ZPM hian ram kan siamtha thei kan ti a, Mizo mipui min fiah turin kan cho a, min enchhin rawh u kan ti. Nitish Kumara leh Kejriwal-a te pawhin an tih theih chuan eng vangin nge tih ve theih loh ang? He rama mi chitin hi an phun luai luai a ni ber a, an beidawn tak vang ni lovin beiseina mual la sah pawh chiah loh awmin an hria a, a ti thei tur an la awma an hriat vang a ni. State hmasawn dangte umphak an chak a, Corruption awm lohna state nih an duh a, danin he ramah hian awmzia nei se an ti a, awmze nei, hah man awma hnathawh an duh a, kan luipuite hman tangkai ve an chak tawh a, zirna tha neih an duh a, thalaite khawvel thar thlenga din an duh a ni. Heng zawng zawng hi ZPM chuan kalphung tharah kalpui tumin policy-ah a bilh tel vek a ni,” a ti bawk.
VL Zaithanzama chuan, “Kum 2018-ah Pathian kaihhruainain ZPM-in inthlanah bul kan tan a, kan lian chho zel a, kan hawikir tawh lo. Lalpa malsawmna kan chan theih nan kan dawhthleng leh huang tizauin ZPM-ah an lo haw mup mup reng a. hming langsar thenkhat phei chu an lo er nghal em em mai a. Assembly House-ah chuan a zai dawn em ni, Inkhel thiam chu inkhel mai rawh se te an ti he haw mai! Zawlnei Isaia chu Pathianin a koh angin a kal mai a, Jeremia chuan ka naupang ti mahse a hman theiha a awm avangin Pathian chuan a sit chuang lo. Gideona chu khawvel mihring tehna atanga mi hnuaihnung leh rethei tak nimahse Pathianin a mite hruai chhuak tur leh chhanhim turin a thlang tlat bawk. A pawimawh ber chu Pathian hruai theiha inpek hi a ni. He party hian Lalpa malsawm rim a nam a, kan kechheh a fuh lo dawna a lanin min siamtha a, min zilhhau a, kan lakah hian Pathian thik thu pawh a chhe bik ni hian ka hre thin. Pathian kohna chhang duh lotu Jona ang mai khan he ram lo kaihruai tawhtute hi mipui manganga rumte an bengharh zo lo. Ram veitu mithiam tak tak, thlir zau leh thahnemngaite au awin awmzia a nei lova, hre reng chunga mihil der an nih miau avangin ben harh mai mai chi an ni lo, chutiang mite thlak tur leh mipui mamawh tihlawhtling turin ramin min kohna kan chhang dawn a ni,” a ti bawk.
