Vanlalnghaka (21) S/o MS Dawngkima Mamit Vaubekawn chu vawiin Ni 14/3/2022 (Thawhtanni) tlai dar 5 vel khan Beraw Lui Hriphaw khaw bulah a tla hlum.
Tv. Vanlalnghaka hian Hriphaw a a chhungte Pu Laihnunate hnenah Kum 2021 Krismas leh Kum 2022 Kumthar a hmang a, chhungkaw thila cham tlangin tun kar tawp lama Mamita rawn haw chhoh tum a nih thu Pu Laihnuna fapa Pu MS Dawngliana chuan a sawi.
Pu Dawnga chuan Nghakatea nen hian vawiinah kuhva Scoop-na tur siamin hna an thawk a, an hnathawk bang tlai dar 5 vel ah a fate nen Beraw luia inbual tura an kal chu a chesual ta niin a sawi. Nghaka chetsual thu hriain tui thiam ten Beraw lui lam an pan nghal a, zan thim hnuaiah engemaw chen an zawn hnuin a ruang hi hmuh a ni.
He thu buatsaih lai hian Nghaka ruang hi Mamit lam panpui tura buatsaih mek a ni a, Mamit Hmar veng Branch YMA ten ruang hi an zu la dawn a ni. Zaninah lumen a ni ang a, naktuk Ni 15/3/2022 chhun dar 11:00 ah vui a ni ang.
