Vawiin 23.06.2025 hian Mizoram Pradesh Congress Committee chuan Congress Bhavan-ah Monday Devotion leh Political Session an hmang a, he huna thusawi tu MPCC General Secretary, Ex MLA ni bawk Pu R. Lalrinawma chuan thu a sawi.
Pu Lalrinawma chuan, “Pu C. Ngunlianchunga, MLA Special Court-in Bail a chhuah chungchangah Bail ka dil lovang a ti si a, tan a hlau leh si, a lo diklo reng em ni Bail a ngaih tak tih te sawi a tam hle a.
“Kumin 2025 March thla Assembly Budget Session laiin Pu Nguna hian ZPM-ten Pu V. Zirsanga LADC-a CEM atana an thlem luh dan vel leh amah Pu Lalduhoma, CM & House Leader ngei pawhin eng eng emaw a tawktarh a neih chungchang huaisen takin a sawi chhuak a, chumi chu chhang ta lo chuan CM chuan “Nangpawh in Case i nei, Lawngtlai Bypass Road siam chungchangah, Anticipatory Bail dil rawh, Prosecution Sanction ka pe dawn” ti te in mawilo takin a deusawh kha kan la hre reng ang a.
“Pu Lalduhawma khan anmahni tan chuan a ti fuh khawp mai Issue a Divert chiang hle a, Pu V. Zirsanga Corruption Case-a Court-in a Convict tawh kum 4 Jail tang tura a lo tih tawh ZPM a thlem luh leh tawktarh chungchang chu Pu Nguna Case chuan a lan chiang hle a ni.
“Pu Nguna hian Case ka neih ka hrelo, chengkhat mah ka eiru lova Anticipatory Bail ka dil lovang a tih ang ngeiin a dil ta lo reng a, hemi hnu hian ACB lamah Case a neih leh neihloh a va zawt a, Case a neih thu an lo hrilh chauh a ni. Hemi hnu pawh hian Anticipatory Bail chu a dil ta chuang lova, a huaisen thlak hle a ni.
“Ni 29 April 2025-ah Prosecution Sanction pek a ni a. Ni 26 May 2025-ah Charge Sheet Special Court P.C. Act-ah thehluh a ni. Ni 17 June 2025-ah Special Court chuan Pu Nguna, Pu V. Zirsanga leh Pu VL Hmuaka te Court-a inlan turin a ko. Pu V. Zirsanga leh Pu VL Hmuaka te chuan Anticipatory Bail an lo lak tawh avangin Charge Sheet Copy pek hnuah Court leh hun tur hriattir an ni.
“He Case Lawngtlai Bypass Road laih hna thawhah sum tih chingpen a awm a ni ti a ACB-ten FIR No.4/2022 U/S 11/13(2) r/w 13(1)(a)(b) P.C. Act 1388 leh U/S 409/120 B/34 IPC Dt. 26.05.2022-a ziah luh daih tawh a Pu Nguna an hnuhluh nachhan chu a CEM hun laiin Lawngtlai Bypass Road laihna tur sum Rs 1143.87 Lakhs NLCPR atangin Ni 26.11.2012-ah Ministry of DONOR-in a Approved a, District Council Affairs Department, GOM-in 1st Installment Rs 457.54 Lakhs pawh Ni 2.08.2013-ah a released a ni.
“Pu Nguna hunlai hian DPR siamna senso Ni 3.10.2013 a pek leh Compensation Provision a awm loh avangin ram neitute leh LADC Official-ten Ni 16.09.2013-a Meeting an neih bak a hna thawh tak tak leh Compensation pek vel te chu Pu Nguna CEM tawh loh hnu MLA, Minister a nih hnu vek a thil thleng a ni.
“He Case hi rang taka ngaihtuah a nih a dikna a lan chhuah thuai leh thil ti diklo an awm chuan an phu tawk a hrem an nih thuai hi kan duh dan a ni a. Court-ah rinna kan nghat tlat a, thudik hailan a nih ngei kan duh a ni” a ti.
Monday Devotion leh Political Session hi Pu Vanhranga Fanchun, Secy. MPCC in kaihruaiin, Pathian thuchah Pu K. Hrangchuanga, Permanent Secretary, MPCC in a sawi bawk.
