**
MNF hian party dangte aia hruaitu tha kan nei hi kan vanneih pui a. Numbe 3 a awmin sorkar ngai an tling nawn thin : Prof.F.Lalnunmawia, MLA
June ni 13, 2023 (Thawhtan zan) khan MNF Unit Hlimen buatsaihin MNF Party zawm thar lawmluhna hun hman a ni a. He hun hi Aizawl South III Bialtu MLA, MNF Adviser ni bawk Prof.F.Lalnunmawia’n a hmanpui.
Mithar lawmluh inkhawm Pu Joshua Zotea Ina neihah Prof.Mawitea MNF Adviser chuan thu sawiin, “Mi ṭhenkhatten MNF sorkar chu engmah thawklo, chhe lailet der angin sawi thin mahse; MNF sorkar hnathawh ṭhatzia hmua zanina mi 51 zetten MNF an rawn zawm thar hi kan lawm takzet a ni. Mizoram leh kan bial hmasawnna atana thawk tlang turin midangte pawh MNF a lo lut zel turin thinlung takin kan sawm reng a ni, ” a ti.
Aizawl South III Bialtu MLA chuan, “MNF hi kan vannei hle a, hruaitu ṭha leh nghet, Leadership nei ṭha leh Party organisation ṭha tak hnuaiah kan awm hi kan vannei bik a ni. Kan elpui party dangte erawh MNF anga Leadership nei ṭha leh Organisation nghet an neih ve loh avangin an buai hle a. An la buai dawn chauh niin a lang. Party lian leh ngelnghet MNF hian a ni telin hma a sawn zel ani,” a ti bawk.
MNF Adviser chuan, Mizoram state kan nih hnua inthlanah kum sangbi tawpa number 8 a awmin sorkar a inthlak zel thin thu a sawi a. Number 3 a awmin a ngai an tling nawn leh ziah thin tiin, kum 10 danah sorkar a inthlak thin thu a sawi. “Kum 1989 inthlanah Congress an sorkar a, Kum 1993 inthlanah an tlingnawn leh a. Kum 1998 inthlanah sorkar a inthlak a, MNF-in sorkarna changin kum 2003 inthlanah sorkarna a chang nawn leh a. Kum 2008 inthlanah sorkar a inthlak a, Congress an sawrkar ve leh thung a, kum 2013-ah an tlingnawn zui. Tichuan, kum 2018-ah sorkar a inthlak a, MNF kan sorkar veleh thung. ‘History repeats itself’ an tih angin kan ram politics hun tawng pangngai angin kumin 2023 inthlan lo awm tur hi MNF sorkar chhunzawm hun a ni. Heng inthlan lo awm tawhah te hian party dang (ZNP, UDA, ZPM) sorkar ve beiseina boruak thawm a lian viau thin a; mahse, an sorkar zo leh thin lo a ni,” a ti bawk.
He inkhawm hi Pu J.Lalhlimpuia President MNF Hlimen Unit-in a kaihruai a, Prof.F.Lalnunmawia MLA hian MNF zawm thar chhungkaw 14 aṭangin Voters 51 chu MNF-ah a lawmlut a. Tin, kum 25 chhung a zawna Hlimen MNF Senior Front President ni thei Pu Hrangkunga chu chawimawina thuziak leh tangkafai a hlan bawk a ni.
Nimin tlai khan Aizawl South III Bialtu MLA Prof.F.Lalnunmawia hian a bial chhung Hlimen YMA Hall-a awm mek Manipur aṭanga raltlante a tlawh bawk.
Prof.Mawitea MLA chuan, “Mizoram Sorkar Pu Zoramthanga kaihhruai chuan Manipur buai avanga Mizoram rawn belte theihtawpin a chhawmdawl mek a, nangni pawhin inpui thlengah inngai ula, thlamuang takin in awm dawn nia,” a ti bawk.
Hlimen YMA Hall-ah hian raltlan mi 20 awmin Hlimen YMA ten lo buaipuiin khawtlangah vehbur te an khawnsak a. Aizawl South III bialtu MLA hian raltlante hi buhfai, Alu leh Dal a pe a ni.
