Aizawl, 12th, March, 2022 : Aizawl West III bialtu MLA Pu VL Zaithanzama chuan a bial chhunga MLA fund hmanga hmasawnna hnathawh ṭhenkhatte tlawhin, Kan sum hmuhte a tlem emaw a tam emaw, dik leh rinawm taka thawh chuan mipui tana ṭangkai taka hman theih turin a thawh theih vek a ni’ a ti.
Vawiin khan Pu VL Zaithanzama, Aizawl West III bialtu MLA leh Pi Ramthanzauvi, Coincillor, AMC Ward 14-te chuan an bial chhunga veng ṭhenkhat – Khatla,, Khatla South, Bungkawn leh Nursery-a MLA Fund leh AMC fund aṭanga hmasawnna hnathawh ṭhenkhatte a hmunah an fang kual a, hnathawh zawh tawh leh thawh mekte chu an ṭha tawk hle tih sawin, ‘ Kan sum hmuhte a tlem emaw a tam emaw, dik tak leh rinawm taka a kan thawh chuan mipuiten ṭangkai takin kan hmang thei dawn a. Kan ta tur leh kan hman tur kan siam miau avangin mipuiten MLA fund hmanga hnathawktute thawh ṭhat leh ṭhat loh chu an hre vek a ni. Bial chhung development hnathawh turah duhsak bik an awm lova, bial mipuiten ṭangkai taka kan chhawr theih hi a hlu ber a ni ‘ a ti.
Pi Ramthanzauvi, AMC Ward 14 Councillor pawhin, ‘ AMC aṭanga Property Tax Returns kan dawn aṭanga hnathawhna tur Rs.5.6 lakh chu ṭangkai takin hman a ni a, veng hrang hranga hemi hmanga hnathawhte a ṭha em em a, hetiang thawk thei tura AMC lama kan hotuten ruahmanna min siamsak hi an chungah ka lawm takzet a ni ‘ a ti ve bawk.
Aizawl West III Bialtu MLA leh Ward 14 Councillor te hi ZPM Block hruaitu leh Unit hruaituten an ṭawiawm a ni.
