Vawiin chawhnu dar 2:30 khan Sports & Youth Services Minister leh Aizawl West-II bialtu MLA Lalnghinglova Hmar chuan Dawrpui Vengthar Presbyterian Biakin chhak leimin chu a hmuna kalin a enfiah a, bialtu Zonal Officer leh PWD hotute nen hmalak zel dan tur an sawiho nghal.
Dawrpui vengthar leimin hian veng chhung kawng pawimawh tak a hnawh pin avangin nunphung a tikhaihlak nasa hle a. Bialtu MLA ho hian PWD leivung paih mek chu chak zawka kalpui dan tur ruahmanna siam a ni a. Tun dinhmuna silpaulin khuh chin bak chu remchang hmasa berah khuh belh tura tih niin, lei min zel tur ven na’n bialtu Zonal Officer hmalakna in DC office, PWD leh DM&R aiawhte’n joint inpection neih a, ruahmanna siam thuai nise ti a rel a ni bawk.
Vawiina bialtu MLA in leimin a tlawhnaah hian Remsanga, SDO, PWD Road North Sub-Division III, KC Zalena, SDC & DM&R Zonal Officer bakah Dawrpui Vengthar Local Council te leh khawtlang hruaituten an tawiawm a ni.