BJP Mizoram Pradesh chuan vawiin khan Lo neitute tana hamthatna inhrilhhriatna hun an hmang a, he hun hmang tur hian Pu K.H Jibon Singh, BJP National Secretary Kisan Morcha, Mizoram incharge ni bawk chu khuallian niin thusawina hun anei a, National Minority Secretary, Mizoram incharge Pi Elizabeth Nongbri leh Pu Vanlalhmuaka State President ten thusawina hun an nei bawk.
Pi Elizabeth Nongbri National Minority Secretary chuan, BJP chu mi tamtakin Hindu Party ang hial a an sawi leh, Kristian te tana tha lo anga an sawi fo chu thudiklo ani tih ka sawi duh a, Mizoram a Kohhran hruaitu thenkhat te nen a inkawmna kan neih na ah pawh BJP nihna diktak ka sawipuiin chungte chu Kohhran hruaitute pawh ka hrilh a ni a ti. BJP chu Sakhaw tihbik nei lo Party ani a, chuvangin hmasawnna pawh rualkhai takin India Ram chhung hmun hrang hrangah kalpui mek a ni a, Sakhaw tin leh hnam tin in chung hamthatna leh hmasawnna chu in ang tlangin kan nei a ni a ti bawk.
Pu K.H Jibon Singh chuan Mizoram Loneitu te tan a Incharge a nih thu sawiin, NE mi tho Manipur mi anih thu asawi a, PM Kisan chungchanga inhrilhhriatna nei tur a lo kal a nih thu leh India Ram Prime Minister Lo neitu te hamthatna tur Scheme 186 awmte Mizoram mipui te hnenah hrilhhriat hi ka lo kal chhan a ni a ti.
Pu Jibon Singh chuan MNF Sorkar hian PM Scheme hrang hrang 186 Lo neitu te hamthatna tur hi mipui hnenah puangzar duh lovin zirtirna pawh an nei duh lova, hei hi a pawi hle a ni. Mizoram a Lo nei a eizawng mi rethei te leh harsa zawk ten heng Scheme kal tlanga hamthatna kan neih na tur hrang hrang kan hriatloh phah a, hamthatna kan dawn tur kan dawn loh phah hi a pawi hle a, he mi a mawhphurtu chu State a Sorkar lai MNF hi a ni a ti.
India ram Sorkar chuan NE ah kawng hrang hrangin hmasawnna ruhrel a din chho mekin, NHIDCL kal tlangin Kawngtha siam sak kan ni mek a, Waterway kaltlanga inkal pawhna te, Railway kaltlanga inkal pawhna te bakah kawng tin rengin Central Sorkar hian NE tan hmasawnna hna an thawk mek a ni. Heng hna te hi thawh zawh anih hunah chuan NE State te angin Mizoram mipui te hian nasa takin hmasawmna kan dawng ngei ngei dawn a ni. Chuvangin Mizoram ah hian hmasawnna tluantling a awm theih nan Mizoram mipuite hian Kum 2023 MLA General Election lo awm tur ah hian BJP lo thawhpui a BJP Sorkar siam ngei turin ka sawm che u a, MADC inthlan lo awm tur ah pawh Siaha mipui ten BJP an Sorkar tir leh ngei dawn a ni a ti bawk.
Hemi hnu hian Pu Vanlalhmuaka chuan thu sawiin, India rama mipui ei tur minpe tu te chu Farmers te annih vangin Pu Modia chuan, ” Heng India Ram eitur minpetu te hi ka ngaihthah thei lo,” a ti a, keini Mizoram ah erawh Lo neitute kuthnathawktu te ngaihthah leh rahbeh anni thung a, vawiin a Lo neitu te leh kuthnathawk tu te hamthatna tur hrang hrang hi keini BJP chuan tih hlawhtlinsak hi kan tum ber a ni a ti.
Nimin a Chief Minister Pu Zoramthanga chuan BJP an zawm theih loh thu a sawi chu, mahni mawnghlim mai a nih zia tilangtu a ni tiin, nikum November thla lawkah BJP/NDA/NEDA Member rinawm tak anih thu ziak meuhvin Union Home Minister Pu Amit Shah hnenah a thawn a, ani ang hi India ram Chief Minister ah tumah an awm lo. Siaha mipuite hi mawl tak ah angai hi apawi hle a, ziak meuh a thu a thawn hi Siaha mipui te, Mizoram mipuite hian kan hria a ni. Chuvangin tun hunah pawh hian a beidawng tawng a ni tih hi a lang chiang hle a ni a ti.
Mizoram Chief Minister Pu Zoramthanga hian Central atanga sum kan pek hi diktak leh fel takin a nihna tur angin hmang turin ka chah duh a, mahni chhungte pawisa kawl nuai tamtak kawlsak anga a insawi hi Mizoram mipuite hian kan awih chuang lova, Kum 2023 ah chuan Mizoram mipui te hian, Assembly House a MNF in opposition te an Bye Bye ang khan Kum 2023 ah chuan Mizoram mipui te hian MNF hi kan Bye Bye ve tawh dawn a ni a ti.
Mizoram Chief Minister chu nakin lawkah Delhi a kal leh hunah Khawi State ah nge Kristian te tihduh dah annih tih hi an lo zawt ngei anga, chutah chuan a hmai a uang tawh lo viau ang. Chuvangin MNF Sorkar hi an tlu mek a, Sorkarna an chelh na ah pawh anbuai hle tawh a, an thutiam tih hlawhtlin theih tak tak pakhat mah anneih loh atang hian Sorkar nawn tlak an ni lova, “Mene mene tekel Uphar sin” tih angin, Bukin i awm a itling zo ta lo ani tih hi an chungah alo thleng dawn ani a ti.
