BJP Mizoram State President Pu Vanlalhmuaka leh State hruaitu dangte New Delhi-a zin chuan Union Minister Pu Mansukh Mandaviya, Union Minister for Labour & Employment, Youth Affairs & Sports leh Pu Jyotiraditya Scindia, Union DoNER Minister leh Pu Shivraj Singh Chauhan, Union Agriculture & Farmers Welfare, And Rural Development Minister te chu an Pisa ah hmuin Mizoram mamawh hrang hrangte sawipuina hun an hmang.
Pu Vanlalhmuaka chuan, Pu Mansukh Mandaviya hnenah hian Mizoram kuthnathawktute dinhmun chawikan dan turte, Mizoram ṭhalai infiamna lamah talent ṭha tak tak nei chawikan dan turte, sport infrastructure kan mamawh dan Pu Mansukh Mandaviya hnenah hian a thlen a. Union Sports Minister Pu Mansukh-a chuan, “Pu Hmuaka hnenah ka ṭhian ṭha tak i ni a, in State tana thu i rawn thlen hi eng vang mahin ka hlamchhiah dawn lo a ni,” tiin a lo hrilh a ni.
Tin, hei bakah hian Pu Hmuaka chu DoNER Minister Pu Scindia nen inkawmna hun ṭha tak nei lehin DoNER Ministry-a Mizoram project tang mek leh on-going te sawipuiin, DoNER Minister chuan, Ministry-in Mizoram tan sum kan pekte an hman ṭhat loh thu hrilhin, Pu Hmuaka hi thawhpui ah a lo sawm a, BJP Mizoram chu DoNER-in fund kan pekte ngun taka lo enzui turin a hrilh bawk a ni.
Hei bakah hian Pu Vanlalhmuaka leh state BJP hruaitute chuan Pu Shivraj Singh Chauhan, Union Agriculture Minister chu a Pisa ah hmu lehin Mizoram loneitute dawmkan dan turte, PM Kisan leh FPO chungchangte, CAU hnuaia constituent college Selesih Vety college leh Horticulture Vety college, Thenzawl chungchangte, Mizoram lo hnathawktu tam zawk te’n a kan thar ṭhat ṭhin êm êm a bikin Sawhthing, Hmarcha, Dragon fruit bakah Hmunphiah etc. chingtute hmakhua tur te an sawipui bawk a. Heng bakah hian Rural Development lam PMAY (Gramin) te, PMGSY phase IV te, Rain water harvesting chungchangte sawi hona hun neiin, Pu Shivraj Singh chuan Pu Hmuaka hnenah Mizoram hmasawnna tur a nih phwt chuan theihtawp a chhuah tur thu leh ṭul a tih angte chu a hnenah ngei thlen zel turin a lo hrilh bawk a ni.
Hei bakah hian Home Secretary, Ministry of Border Management, pawh a pisaah an hmu a, Indo-Bangladesh border fencing chungchang a sawipui bawk a ni.
BJP Mizoram State Headquarters hruaitute Central dawra zinte chuan Mizoram mipui tam zawk ten BJP nihna dik hrechiang hrih lo mahse kan la hriatthiam hun a la awm ngei dawn a, BJP-a kan awm chhan Mizoram leh Hnam hmasawnna hrang hrang a lo thlen theihna turin theih tawp kan chhuah zel dawn a ni, an ti a. Mizoram mipui, a bikin mi rethei zawkte chawikan kan nih theihna tur leh kuthnathawktute’n lei rem an rah ve theihna turin theihtawp kan chhuah zel dawn a ni, an ti bawk.
