Congress party chuan thuchhuah siamin, “Manipur buaina chuan thla hnih chuang a awh hnuah mi 100 chuang zetin nunna an chan tawh a, Biak In leh chenna in sang chuang hal chhiat ani a, mi 50,000 chuang relief camp 1,000 chuangah an awm mek a. Manipura Zohnahthlak te tana Mizoram mipui, tlawmngai pawl leh Kohhran te’n nasa taka hma an lakna te hi chhhuanawm kan tiin Zofate in pumkhatna nasa zawk min pe niin Congress party chuan a ngai a, Mizoram mipui chungah lawmthu a sawi a ni.
“Hetiang a nih lai hian India sorkar chuan Manipur buaina a ngaihsak loh zia rampum in kan hria. Manipur khaw tin mai a alh hluah hluah lai pawhin Home Minister Amit Shah leh PM Modi-te chu Political campaign in an buai a. Tlai khaw hnuah Home Minister Amit shah chuan Manipur a tlawh a, awmzia a nei lo. Prime Minister Narendra Modi erawh Manipur tlawh chu sawiloh, Manipur buaina chungchangah a ngawi hmak.
“Hetiang a nih lai mekin vawiin ni 2.7.2023 (Pathianni) Christian te ni serh Pathianniah ngei Langza khuaah Meitei ho lutin chenna in bakah Pathian Biak In nen lam an hal fai vek a. Kan unaute chhanhim tuma beitu David Thiek chu Meitei hovin rawng taka thatin a lu tan sakin khaw daiah rapthlak taka an tar thu media lamah tarlan a ni.
“Manipura Zohnahthlak te an rum takmeuh laiin Mizoram kan Chief Minister Pu Zoramthanga hian hmalak ngaihna hre lovin kan unaute himna leh damkhawchhuahna lam pawh ngaihtuah lovin Campaign buaiin a buai a. Amah pawh be duh lo tu, Manipur Chief Minister Biren Singh-a’n Zohnahthlak te chunga rawng taka chet hnuah phone hmanga bia in chu chu a hmalakna neihchhun a ni. Pu Zoramthanga Chief Minister na hnuaiah hian Mizoram leh Zohnahthlakte dinhmun a him lo takzetah Congress Party chuan a ngai a ni.
“Manipura kan mi leh sa te chunga rawng taka chetna titawp tura hmalakna kal pui thuai turin Congress Party chuan MNF sorkar a ngen a, Kan unaute dinhmun hima an awm hma loh chuan BJP an thawhpuina pawh a ranglama chhu chat nghal turin kan ngen a. MNF party nge a dah pawimawh Mizoram mipui leh Manipura Zohnahthlak te himna tih thlang fel thuai turin kan phut a ni.
“Congress party chuan Central hotute leh State a Congress hruaitute nen inberawn zelin heng kan unaute sahimna tur hian chak zawk leh nasa zawkin hma a la zui zel dawn a. Kan unaute leh Christian Sakhua chimral tuma nekchep mektu BJP paihthla tura tangrual turin Mizoram chhunga NGO te, Kohhran leh party hrang hrang te kan ngen a ni,” tiin an tarlang a ni.
