BJP State Office Atal Bhawan ah vawiin khan karthar inhlanna leh Political Session neih a ni a, Lalrinawma Chhangte, BJP Aizawl District Vice President chuan inkhawm a kaihruai a, Vanlalhmuaka State President in mithar lawmluhna leh thusawina hun anei a ni.
Vanlalhmuaka chuan, “Mizoram hian politics a tawn hriat ngah aiin mipui hmaa intiamna tipuitling thin hruaitu leh Party kan mamawh zawk. Chutiang chu Mizoram hian state kan nih atangin hmuh tur kan la nei lo. Mipui hma a intiamna hlen thin Party leh hma la thin Party chu BJP Pu Narendra kaihhruai Party hi a ni a, chu Party chu Mizoramah hian kan sorkar a ngai a ni,” a ti.
Vanlalhmuaka chuan, “Tun hnaia 4-lane compensation chungchangah revenue leh forest lamah buaina awmin ram neituten kawng dangin hnathawh tur an ti khaihlak nasa hle a. He buaina chungchangah pawh hian State sorkarin a mawh la ngam lovin, mipuite chu kal ngaihna hre lovin a siam a ni ber a. 11.11. 2022 a Gadkari, Honble Minister, MoRTH, Govt of India leh CM leh official ho a meeting neihah khan Mizoram a project work hrang hrang kal mekte chuan duhthu a sam lovin, State sorkar in harsatna an siam thu leh harsatna awm te a rang lama chingfel turin a hriattir nghal a. Kawngpui siam chungchangah hna tikhaihlak lo turin state sorkar chu Pu Gadkari hian meetingah hian a hriat tir a ni. Compensation chungchanga buaina pawh a rang lam chingfel turin a hriattir bawk a ni,” a ti.
Vanlalhmuaka chuan, “Mizoram chhunga kuhva chingtute buaina pawh sawiin, Mizoram a kuhva chingtute buaina leh harsatna chinfel dan chu Mizoram sorkar hian a hre lo nilovin, a chingfel duh loh zawk a ni,” a ti a. “Chingfel duh nise chu Burma atanga kuhva ro kudam, dan lova lak luh Mamit, Kolasib leh Champhai District a mi te hi man vek se la, ni khat thil thu ah Mizorama kuhva chingtute buaina hi chin fel nghal a ni ang. Chuvangin Kuhva chungchanga Mizoram sorkar dinhmun chu Muhil der kaihthawh tum a tho thei lo nen a in ang reng ani a ti. Mizoram in a tih tur a tih loh avangin Kuhva chingtute hian harsatna an tawk mai a ni. Mawhpuh tur dang an awm lova, amawh phurtu diktak chu Mizoram sorkar hi an ni,” a ti bawk.
Vanlalhmuaka chuan, “Mizoram hian Mizoram tan a pa ni ngam, mawhphurhna la ngam, thil ti tak tak ngam kan mamawh a, chutiang mawhphurhna la ngam awm chhun chu BJP te hi kan ni a, chutiang kan tih theih dawn avangin kum 2023 election ah Mizoramah Modi kaihhruai BJP Sorkar a piang dawn a ni a ti bawk.
Vanlalhmuaka hian nimin inkhawm ah BJP zawm thar mi pariat a lawm lut bawk a ni.
