Vawiin June 19, 2023 (Thawhṭanni)-a Party OB Meeting, Khatla-a neih ah Meeting kaihruaitu Vanlalruata, President chuan kumin inthlanpuiah BJP tlin loh nan party hrang hrang thawh ho a ṭul thu a sawi.
Vanlalruata chuan, “PC Party innghahchhan chu, ‘Kan ram, kan hnam leh kan sakhua a him tur a ni’ tih niin kan ngai pawimawh em em a, kan ram leh hnam leh sakhua innghahna lungphum sawi ṭhiah tumna eng pawh kan do zel dawn a, tuna BJP chet dan hrang hrang en hian kan party innghahna lungphum ṭhiah tumna nia kan ngaih tlat avangin dodal ṭul kan ti a, kan party chakna mai a tawk loh avangin kan ram, kan hnam leh sakhaw humhim nan party hrang hrang kan ṭan rual a ṭul,” a ti.
“India hmarchhak state zingah Mizoram state hi Lotus la par chhuah hleih theih lohna awm chhun a tih theih a, kan vannei hle. Hei vang hian BJP chuan chawr chhuah tumin hmasawnna hmathehin chak takin an bei mek a, kum 30 chuang kal ta a Pu Ṭhena’n kan ram hmasawnna tura hmathlir a lo neih tawh kha vawiin thlenga kan mamawh bul leh hmasawnna tluantling kan neihna tur a ni,” a ti bawk.
