Vairengte September 19th, 2023 : September 19, 2023 (Thawhlehni) zan khan Vaireng Election Campaign Office-ah ZPM Vantlang Inkhawm neih a ni a. He hun hi B. Sangluaia, Serlui North Block President chuan a kaihruai a, K. Sapdanga, Working President leh Thangkhuma, PAC member ZPM General Headquarters ten thu an sawi a ni.
K. Sapdanga chuan thusawiin, “ZPM hi kum 6-a upa kan ni a, MLA General Election hi vawi khat kan hmachhawn tawh a, tun tum hi kan vawi hnihna tur a ni. Tunah hian Bial 40 awm atangin bial 39 ah Candidate tur kan puang fel tawh a. Serlui biala ding tura ruat hmasak zawk Pu Jimmy Laltlanmawia chu damlohna avanga a din tlang theih dawn tak loh avangin Pu C. Lalthanfela hi ZPM Official Candidate atan ruat a lo ni ta a, Pu Jimmy Laltlanmawia pawhin damna a chan theih ngei theihna turin i tawngtaipui zel ila, a aiawh tura General Headquarters in min pek Pu C. Lalthanfela hi lo thlang tling ngei ula, kalphung thar mipui sawrkar siamna atana mi chhawrnahawm tak a ni ngei dawn a ni,” a ti.
K.Sapdanga chuan, “Political party tlin inbeisei pathum te zingah hian ZPM hi Unit ngah ber kan ni ta mek a, kan chin hre mang lo ten Aizawlah chuan in tha a, thingtlang lamah hian in tha lo deuh a ni an ti a, keini Zoram dung leh vang fanga zin tawh te erawh chuan Aizawl aia thingtlang lama kan chhiat zawkna kan hmu lo mai ni lovin, kan tha zawk mah a nih awm hi maw kan ti a ni.
“Tun hnai inthlan awm reng rengah ZPM chuan Pathian malsawmna kan chang chho ta zel a, a boruakah chauh in tha tia min sawi thin te hi vote hmangin a nih loh thu mipuiten an lantir zel a ni. Hei hi kan that bik vang ni lovin, kalphung thar mipui sawrkar chakin an tuihal mek a ni tih an vote hmangin an lantir a, MNF kulhpui an tih thin vengah pawh Local Council Bye Election-ah hnehna kan chang thei ta hial a ni.
“Thawhrimna kan zuar a, sem hmanga ram chhanchhuah theih a nih loh thu kan tlangaupui a, kut hnathawktu sawrkar din kan tum thu huai takin kan sawi bawk a. Heti taka ZPM party min hruaitu hian kawng laklawhah min tawpsan mai lovang tih hi kan ring tlat a, mipui beiseina tithlawn lo turin ZPM chu kan inbuatsaih mup mup ta a ni. A hun takah sawrkar hnathawkin hlawh a lak theih leh hun tur a nghakhlel a, kohhran hruaitu, NGO hruaitu, Driver leh rim taka thawktu zawng zawng deuhthaw hian sawrkar thar hmuh thuai thuai hi an duh a, thalai te hlei hlei hi a nghakhlel an ni ta em ni tih tur a ni mek a.
“A nih tur ang sawrkar nih tir thei kalphung thar hmuh an duh a ni. Kan sawrkar zirna sikul mumal hlei thei ta lo te, thil engkim mai a nih loh dan tur ang deuh veka kal ta anga lang te hi a lungchhiatthlak a; thalaite mangangin nu leh pa te vote thlakna tur min kawhhmuh ta hial a ni. Chief Ministerial Candidate tha tak Pu Lalduhoma kan nei hi kan vannei a, a hruaina hnuaiah ZPM hian Zoram tha zawk hmuh tir che u kan beisei tlat a ni,” a ti bawk.
