Mizoram aţanga Tripura a inbengbel tawh Mizoram district pathuma vote la nei si Bru hnam mi 6,232 te chu electoral roll aţanga an hming paih fel a ni.
District pathum a official-te hnen aţanga thudawn danin electoral roll ennawn hna kal mekah August ni 2-a draft roll tihchhuah hma ngeiin Tripura a inbengbel tawh Bru vote neite hming paih hna hi zawhfel tura ruahman a ni a. Chu chu ngawrh taka thawkin district pathum – Mamit, Kolasib leh Lunglei a assembly bial pathum ţheuh a Bru vote la nei hmingte chu paih fel a ni tawh. Mamit district-ah hian Bru vote nei hming la chuang 4,950 paih a ni a. Kolasib district-ah hming 948 leh Lunglei district-ah hming 334 te paih fel a ni tawh a ni. Kolasib leh Lunglei district-a assembly bial pathum ve ve-ah hian Tripura a cheng Bru vote nei hi an tam tawh loh avangin tunhnai a ni 15 hun pek chhungah hming paih hna hi an zo har lova. Mamit-ah erawh chuan hming a tam avangin an zo har hret ni a thudawn a ni.
Mamit district chhunga assembly bial 3 – Hachhek, Dampa leh Mamit a Tripura a inbengbel tawh Bru vote nei mi 4,950 la awm te chu Mizoram electoral roll atanga paih fel an ni. Mamit bawrhsap pisa Election Branch atanga thu dawn danin tun Zirtawpni zan dar 11 leh a chanve khan Tripura Bru camp a awm, Tripura a inbengbel tawh, Mamit district a Electoral roll a la awm vote nei mi 4,950 te chu Mizoram electoral roll atanga paih zawh vek tawh a ngaih an nih thu dawn a ni.
Kum 2020 Delhi a kil li atanga inremna angin Mizoram Electoral Roll a la awm Bru, Tripura inbengbel tawhte chu Tripura State chhungah khua leh tui nihna nei vek tawh tura ngaih an ni a, he inremna ang hian electoral Roll atanga paih tura hmalak a ni a. Heng Bru Mamit district chhunga vote nei mi 4,950 zette paih an nih theihna tura hmalaknaah, hun tiam ni 15 chhung nghah a nih hnuin dodalna a awm lova, heng mite hi Mizoram electoral roll atanga darkar 24 chhunga paih zawh vek tura tih a nih angin Mamit bawrhsap pisa a Election Branch chuan darkar 24 chhungin an paih zo vek a ni.
