Vawiin khan Lalrindika Ralte, MLA chuan Aizawl Press Club-ah chanchinthar lakhawmtute a kawm a, “Kumin Mizoram sorkar budget (2022-2023)-ah hian MNF sorkar hian Sorkar hnathawkte hlawh (salaries) tur nasa taka ti tlemin, Sorkar chu inrelbawlna senso (revenue expenditure) atana sum hmang tlem tur angin a inlantir a. Sorkar hnathawkte hlawh tur kher hi chu kum tin tlem tala pung tur a ngaih a nih laia a tlem zawk tlat hi thil mak tak a ni,” a ti.
Lalrindika chuan, “Sorkar hnathawk mimal kum tin hlawh pung (increments) leh Central Pay Scale mila thla 6 dana Dearness Allowance pungte vang ringawt pawh hian a hma kum ai chuan sorkar hnathawk hlawh atana senso hi a pung ngei tur a ni. Mahse, kumin Budget Estimate (BE) a Demands/Department 29-a hlawh atana dah hi kum hmasa Budget Estimate (2021-2022) aiin cheng nuai 17,689 (Vbch. 176.89) zetin a tlem zawk ta tlat a, kum hmasa a phak lohna hi a tam tham hle a ni.
“Kum 2019-20 Budget Estimate-ah kha chuan heng Demands/Department 29-ah tho hian sorkar hnathawk hlawh atana dah hi a hma kum, 2018-2019 Budget Estimate (BE) aiin cheng nuai 50,047 (Cheng vbch 500.47) zetin a tam zawk a. Hei hi estimate dik deuh zawk chu a ni ngei ang; hlawh kher kher hi chu kum tina pung tur a nih miau avangin.
“Sorkar sum hmanna tura ruahman, Budget reng reng hi chhut chhinna a nih avangin ennnawn (revise) a nih leh dante kan hre vek a, a danglamna hi Supplementary Demands-ah siam rem a, Assembly House-a pass thin a ni tih pawh kan hre vek awm e. Amaherawhchu, sorkar hnathawk hlawh tur kher kher hi chu sorkar hnathawk awm zat hriat sa vek a nih avangin dik zawka Chhut chhin (estimate) theih a ni a. Chhut dik thlap theih ni lo mah se, a hma kum aia tam ngei ngei tura ngaih a nih laiin, a hma kuma sum dah pawh pha lo a, heti em em a hlawh tur chhut tlem a ni hi “Budget Tha” ang a lantir tumna leh mipui bum tumna dik takah kan ngai a ni,” a ti a.
“Sorkar hnathawk hlawh tur nasa taka tih tlem a nihna chhan hi sawifiah ngei turin kan Chief Minister, Finance Minister ni bawk Pu Zoramthanga hi kan phut tlat a ni,” a ti bawk.
