Assembly Budget Session neih mekah vawiin khan Aizawl North II Bialtu MLA Dr. Vanlathlana zawhbelhna chhangin, Commerce & Industries Minister Dr. R. Lalthangliana chuan Aizawla DIC building chu multipurpose centre atana siam tum a nih thu leh sum lam harsatna avangin tihhlawhtlin theih ala nihloh thute, bawhzui zel a nih thute a sawi a, Dampa bialtu MLA Lalrintluanga Sailo zawhbelhna chhangin West Phaileng market sakna tur chu NEC fund flow system thar hman avangin a muan deuh thu leh reiloteah hna tan thuai an beithu thu a sawi bawk a ni.
Zawhna leh chhanna hunah vek hian East Tuipui bialtu MLA Ramthanmawia, Aizawl North III bialtu MLA C. Lalmuanpuia leh Aizawl West I bialtu MLA Zothantluanga te zawhna intawm chhangin, Lacal Administration Department changtu Minister K. Lalrinliana chuan RGSA chu gram panchayat emaw Village Council emaw te theihna tipung tura training pek bakah tangkai taka mipuite rawngbawl hna an thawh theihna tura anmahni tihchakna tur scheme anih thu house a hrilh a, direct taka mipui vantlang hamthatna tur nilovin Village Council kaltlanga hmalakna tur anih thu sawiin, RGSA hnuaiah hian VC House 150 sak anih tawh thu te, computer set 243 pek anih tawh thu leh VC 20 hnenah Common Service Centre pek anih tawh thute house a hrilh a ni.
Mizoram Legislative Assembly Budget Session neih mekah hian vawiin vek khan Minister Dr. R.Lalthangliana chuan The Mizoram State Human Immunodeficiency Virus & Accuired Immune Deficiency Syndrome (Prevention & Control) Rules, 2022 chu House-ah a pharh a, Minister Lalchhandama Ralte chuan The Mizoram Code on Wages Rules, 2022 pharhin Minister engineer Lalrinawma’n The Mizoram Liquor ( Prohibition ) Rules, 2022 chu house-ah a pharh a. House Member Zothantluanga chuan Second Report on Actions taken by the government against the reccommendation contained in the first report of committee on petitions relating to School Education Department chu House ah a pharh bawk.
Thutkhawmah hian Chief Minister Zoramthanga Bill putluh, The Sinlung Hills Council (Amendment Bill), 2023 chu sawiho a nih hnuah pawm a ni a, Minister Lalchamliana Bill putluh, The Mizoram Scheduled Tribe and Scheduled Castes ( Regulation of Issuance and verification of) Community Certificates (Amendment) Bill, 2023 chu sawiho niin pawm a ni bawk a, Minister Lalruatkima bill putluh The Indian Stamp Mizoram (Amendment) Bill, 2023 chu sawiho anih hnuah pawm a ni bawk.
