Mizo Hnam Run chhung inkhawm vawiina neihah K.Lalrinliana, MNF Adviser chuan, “Buhfai-ah Intodelh rih lo mah i la, ration-ah harsatna a awm lo. Buhfai dinhmunah kan thar chhuah tlem ngaihtuahin, engemaw thut lo thleng mahse, thla 3/4 ei chu stock sa kan nei,” a ti.
Supply Minister chuan an sorkar hlim khan Chief Minister hovin NFS, BPL/APL tan ration-ah Zoram mipui thar chhuah ngei lei an tum thu a sawi a. Mizoram hian thla khatah buhfai quintal nuai khat chuang an mamawh thin thu sawiin, Mizo thar chhuah an lei kha quintal 23 lek a nih thu a sawi a, lei tur chu awm se Mizoram thar chhuah ngei lei an duh thu leh Mizo thar chhuah lei tur an hmuh khawp loh thu a sawi a ni. Rice Mills pawh Agriculture Minister hovin a bial chhung leilet tamna hmunah an din tawh thu te, tih tham mipuiin an la thar lo chu pawi a tih thu a sawi. Champhai lam buhfai that thu leh a man to bik thu sawiin, Pathian hian eng hunah emaw chuan min la intodelh tir ngei ka ring a. Intodelh rih lo mah i la, ration-ah harsatna a awm lo. Buhfai dinhmunah kan thar chhuah tlem ngaihtuahin, engemaw thut lo thleng mahse, thla 3/4 ei chu stock sa kan nei a ti.
Supply Minister K.Lalrinliana chuan tumahin hma lam hun kan hriat loh thu sawiin, ram a lo buai thut thei a, chutiang hunah chuan ration pawh lak reng theih a ni lo thei a, Mizote kan intodelh a tul thu a sawi a. Kan Chief Minister hovin SEDP Governing Board-ten eizawnna ngialnghet an ngaihtuah zel tiin, family oriented-a kalpui mek a nih thu a sawi bawk. Congress khan kha zat NLUP sem mahse, an hlawhtlinpui lo a, hlawhtling nia an sawite pawh huan ram nghet nei sa, an pekte an ni, a ti.
K.Lalrinliana chuan congress sorkarin kawng an ngaihthahzia thu a sawi a. “Kan sorkar tantirh khan sum awm ang ang leh Central sorkar atangin kan Chief Minister-in a ngaihtuah a, kawng chhe zualpui siamthat deuh vek a ni a. Double lane mai ni lovin Four lane thlengin hmalakna lian tak kan kalpui ta mup mup mai a ni. Kan CM hian Hortoki to Meidum hma a lak vut vut hi 60% emaw 70% vel chuan an thawh zawh tawh ka ring a. ONGC leh IOL-ten Meiduma gas an lak chhuah hi hralh sum atan duhthusam chiah a la ni lova, a chhakah hian hralh tlak hmuh ngei inbeiseiin hmalakna a kal mek a ni. Kan lei hnuai hausakna haichhuak turin hma kan la mek a, state share pawh 50-50 turin kan nawr a, kan share hmuh chu eng zat pawh nise kan that pui hrim hrim ang. Kan sorkar hma khan Gas hi ni khatah trip 15 vel kan dawng thin a. State dang an hnianghnar si a, Union Petroleum Minister-ah ka nawr a, nitin trip 23 kan dawng ta char char a ni. Gas Bottling plant kan neih nitin trip 7 pe chhuak thei hi tilian turin hma kan la mek bawk,” a ti a. Vairengtea oil depot khu kan kham khawp loh thu sawiin, stock-na hmun tha zawk nei tura ruahmanna chak tak an kal pui mek thu a sawi a. Zuangtui Godown pawh Sairang thlangah FCI godown lian zawk sak mekah an sawn tur thu a sawi.
