India siam chemical fertilizer thahnem tak Burma lama phurhluh thin nia sawi chu, thei leh thlai atana pek tur niloin damdawi ruihtheih – Methamphetamine siamna atan zawka lak chhoh nia hriat a ni.
Sawrkar laipui hnuaia foreign intelligence agency – Research and Analysis Wing (RAW) in a hriat danin, Mizoram kaltlanga Burma rama chemical fertilizer phurhluh thin hi Methamphetamine (meth) siamna atana tih ni a ngai a. Thildangah an hmang lo tih intelligence report-ah dawn a ni. “Burma ramah hian Burma sawrkar pawhin a thunun theih vak loh Wa hnam awm tamna ‘Wa State’ a awm a, anmahni’n ro inrelin sipai (United Wa State Army) pawh a hranpa hlakin an nei. An ni hian methamphetamine leh heroin hi an siam nasa a, Burma rama hel pawl hrang hrang hnena ralthuam hralh nen, heng hi an sum hmuhna liantham ber a ni. Wa state-ah hian heng fertilizer hi a lut chho nia hriat a ni” thudawnna chuan a ti.
Fertilizer/ urea siamna atana pawimawh anhydrous ammonia (N 13) hi meth siam atan pawha hman ber a ni tih chu mithiamte sawi dan a ni a. United States leh ramdangah pawh kum 2000 tir lam atang daih tawh khan hmang tawhin, an loneituten an thlai pek atana an farm-a bur liana pui puia an hun anhydrous ammonia telna fertilizer hi meth siamtute hian an lo ruksak fo tawh tih sawi a ni.
Thudawn danin, Mizoram sawrkarin loneitute tan sawrkar laipui atanga quota an neih angin, chemical fertilizer hi a lalut thin a, Mizoramah hian fertilizer dealer hi 10 chuang an awm a ni. Heng leitha hi loneitute hnenah subsidy-a pekchhawn leh tur a nih laiin, loneitute hnen thleng lo a tam hle thin nia sawi a ni a, a kalna ber chu Burma lamah nia hriat a ni. Fertilizer hi thuneitu lam pawhin Burma lama lut chho tur nia ngaih hi an man fo a, Assam lamah pawh Mizoram panpui fertilizer, dan loa tawlh nia hriat man an nei fo tawh thin a ni.
