BURMA MP LEH MLA TE THLAHUALNA NEI
Vawiin 9.4.2022 khan YHAI, Luangmual ah Zo Reunification Organization (ZORO) chuan Aizawl leh a chhehvel a awm Burma MP leh MLA te an ram buai avanga Mizoram a lo raltlan te thlahualna hun an hmang a. Inkawm khawmna hun te hman a ni a, he inkawm khawmna hun hi Pu R. Sangkawia President in a kaihruai a, Pu Rohmingthanga Kawlni Vice President in hunserh a hmang a ni.
He huna thusawitu ZORO Thalai President L. Ramdinliana Renthlei chuan, “ZORO chu khawvel hmun hrang hrang a awm Zofate in inpumkhat a, kan insuihkhawm a, rorelna pakhat hnuaia kan awm theih nana bei tute kan ni a. ZORO chuan a thiltum te a hlawhtlin theih nan ke a pen reng a, ZORO thiltum ti hlawhchham zawng a lo khawsa an awm chuan na takin a dodal mai thin a ni. ZORO chu Zofa khawvel hmun hrang hrang a awm te thla vang hauh ngai an awm in ke a pen mai thin a, Zofate kan inpumkhatna leh kan insuihkhawmna dal thei tu awm apiang chu sut kian a nih theih nan hma a la zel thin a ni. Mizoram ah hian in lo inti mikhual ang tih kan hlau a, Mizoram hi in ram a ni tih in hriat ka duh a ni.”a ti a.
L. Ramdinliana Renthlei chuan, “Burma ram democracy a nih theih nan kan bei mek a, ZORO chuan Mizoram hi India atanga in lak hran tum in kan bei ve mek bawk a. Democracy kan nih theih nana kan beihna ah leh independent kan sualna ah hian kan hlawhtlin hma chu kan bei tur a ni a. Kan hnam tana Martar (nunna hlan) thahnem tak an awm tawh avangin tlawm thiang kan ni tawh lo a, hnung tawlh thiang kan ni tawh lo. Kan hlawhtlin hma chu kan bei zel tur a ni.”a ti bawk
Thusawi tu dang Pu Salai Lian Luai Chin State Chief Minister chuan, “ZORO in min ngaihsak a, min lo buaipui thin hi kan lawm hle a. Burma atanga lo kal MP leh MLA te hi Burma ram hmun hrang hrang a mite kan ni a. Christian vek kan nilo a, Sakhaw hrang hrang nei kan ni a mahse kan ram danah chuan Kawl leh Zofate hi unau ang mai in kan tangrual a ni. Burma hi democracy a nih theih nan hma kan la mek a, federal union kan din dawn avangin hnam tenau zawkte intluk tlanna hi kan rilru ah a awm reng a, hei hi kan ngai pawimawh hle a ni. ZORO policy leh thiltum hi kan rilru a kan lo pawm dan sa vek a ni a, kan thawhho zel a pawimawh hle a ni. Mizoram mipui ten kan harsatna hria a min lo dawnsawn dan ah thinlung takin lawm thu kan zavaia aiawh in ka sawi a ni.”a ti.
ZORO hruaitute leh Burma MP leh MLA te chuan inkawm khawmna hun hlimawm tak an nei a. Burma MP leh MLA te atangin thusawi hrang hrang ngaih thlak a ni a, hnam inpumkhatna tur kawng hrang hrang sawiho a ni. Thlahualna zanriah an kilho nghal a ni.
