Mizoram sawrkara Cabinet Minister ni turin Pu K. Lalrinliana, Pu Lalchhandama Ralte, Pu Lalruatkima leh Er. Lalrinawma te chu Governor Pu Hari Babu Kambhampati chuan rinawmna thu tiam tirin vawiin dar 11 A.M khan a lalut.
Cabinet Minister thar lakluhna inkhawm, Raj Bhavan Circular lawna neihah hian Chief Minister Pu Zoramthanga, Dy. Chief Minister Pu Tawnluia, Speaker Pu Lalrinliana Sailo leh Minister dangte leh MLA te bakah mi sawm bikte an tel a. Chief Secretary Dr. Renu Sharma chuan rinawmna thutiam lakna hi a kaihruai a ni.
Mizoram Gazette (No.J.11012/6/98-POL, dt.20th December, 2022) a chhuah angin Pu K. Lalrinliana, Pu Lalchhandama Ralte leh Pu Lalruatkima te hian Minister of State an nih laia an department chan te an chang chhunzawm dawn a. (ie, Pu K. Lalrinliana – Food, Civil Supplies & Consumer Affairs Dept., Local Administration Dept. leh Fisheries Dept.; Pu Lalchhandama Ralte – School Education Dept., Labour, Employment, Skill Development & Entrepreneurship Dept., leh Printing & Stationery Dept.; Pu Lalruatkima – Rural Development Dept., Land Revenue & Settlement Dept. & Information & Public Relations Dept.)
Er. Lalrinawma chuan Social Welfare & Tribal Affairs Department, Excise & Narcotics Department, Sericulture Department leh Animal Husbandary & Veterinary Department te a chang dawn a ni.
