New Delhi a Parliamentary Standing Committee on Health and Family Welfare ruat thar thutkhawmna hmasa berah Lok Sabha MP C. Lalrosanga chuan, he Committee a Member a nihnaa a thusawi hmasa berah, Mizoram leh hmarchhak bial state dangah te Cancer natna vei an tam thusawiin, chiang taka a chhan chhuichhuah leh a invenna lamte inzirtir nasat a tul thu a thlen a. He zirchianna atan hian hma la turin Parliamentary Committee chu a ngen a ni.
C. Lalrosanga chuan mithiamte chhui danin rilru lam natna vei Manipur ah an tam ber laiin, Mizoramah pawh an tam a ni tih a sawi a. Hetiang enkawlna hmun, mental health institute 47 awmna state te zingah Manipur leh Mizoram an lan ve loh avangin heng state ah te pawh hian rilru lam natna enkawlna hmun bik din ve ngei turin Sawrkar Laipui a ngen a. Parliamentary Committee on Health and Family Welfare thutkhawmnaah hian ramchhunga hriselna lam thu hrang hrang sawichhuah a ni.
An thutkhawm tawp hnuah he Committee member tharte lawm pahin Union Health and Family Welfare Minister Mansukh Mandaviya chuan he committee a thu ngaihtuahte leh member te rawtnate ngaih pawimawh a nih tur thute a sawi a. Ram hriselna lam enkawl that zawkna tura an rilru leh ngaihtuahnate seng tam turin member-te chu a ngen a ni.
