Vawiin July 26, 2024 ( Zirtawpni) chhun dar 12 : 00 khan Pu Vanlalruata PC Party President chuan Party office ah thu sawiin, Mizoram sawrkarin a duh phawt chuan CBI te duh duha thil chhui thei tura general consent a pek theih zia leh tun dinhmuna general consent a pek loh thu a sawi.
Mizoram sorkar leh CBI indawr tawh dan hrang hrang sawiin Pu Ruata chuan kum 1990-a Mizoramin CBI hnena consent a lo pek tawh thu te, 1995-a hei hi sawrzim a nih a, 2002-a consent tihtawp anih thu te a sawi a. “ZPM a lo sorkar a, an sorkar hlim teah general consent an pek thu insawitheihnan an hmang a. Mipui pawh kan lawm a, corruption case lian te CBI in an chhui hun tlumtea thlir taka kan thlir laiin kumin June 27 khan hei hi tihtawp leh a ni,” a ti.
Pu Ruata chuan, “Heti chunga kan Chief Minister leh ram hruaitu thenkhatin CBI te general consent pe anga an insawi reng hi a dik lo a. An party Dan hremi ho phei chuan CBI te general consent pek theih anih loh thu Press Conference hial neiin an sawi a. Hetiang thu inkalh ngaihthlak fo hi a ninawm a ni,” a ti.
CBI te general consent pek hi a that leh that loh chu a thlirtu ngaihdana innghat a ni a, chutihlai chuan sorkarin a duh anih phawt chuan general consent hi a pe thei a ni, tiin Pu Ruata chuan, “Mahni party legal cell in consent pek theih loh anga an sawi bawk si, hruaitu ten consent pe anga insawi bawk si hi thu awmze neilo a ni,” a ti bawk
