Mizorama Kohhran thalai pawl Lian ber, Central Kristian Thalai Pawl (CKTP) buatsaih ‘Chhanchhuahna Camping’ tia a hming vuah, Ruihhlo ngaiten tisa leh thlaraua piantharna an chan theih nana Ni 20 awh tur, Gospel Camping an buatsaih chu nizan, Ni 19.9.2023, zan dar 8:30 khan tlawmngaipawl lian ber, Central Young Mizo Association (CYMA) hruaituten Synod Rival Camping Centre, Neihbawihah kal chilhin tanpuina pawisa fai Rs.1,00,000/- (Cheng Nuaih khat) an hlan.
Central YMA aiawh hian President R. Lalngheta hovin Office Bearer’s 4 bakah CEC member mi 12 te tanpuina pe hian an thawkchhuak a, Central KTP lam aiawhin Leader Rev. Dr. F. Pachhunga bakah Asst Leader leh General Secretary hovin Commitee member engemawzat in an lo dawng sawng a ni.
Central KTP Leader, Rev. Dr. F. Pachhunga chuan Mizo thalai tam tak ruihhloin nasa taka a tihbuai mekte chhanchhuak tura Central KTP te rawngbawlna min hriatsaka kan rawngbawlna tichak tura Central YMA te an rawn pen chhuak chu lawmawm a tihzia leh hei hian rah tha tak a chhuah ngei ang tiin lawmthu a sawi.
Central YMA aiawhin President R. Lalngheta chuan kan thalaite hian ruih tur kan duh si a, a mangan thlak tak zet zet a ni a ti a. Anmahnia talchhuak thei tawh lo, ruihhlovin a tih buai kan thalai rualte chhanchhuak tura Central KTP hmalakna fakawm an tih thu sawiin in tha tihchakna a nih beiseiin Central YMA chuan a tih theih tawk tih a duh a ni a ti a. Central YMA aiawhin tanpuina hi Fabian Lalfakawma, Treasurer Central YMA in a hlan a ni.
He Chhanchhuanna Camping ah hian veng hrang hrang atangin ruihhlo in a bawihbeh mek thalai mi 507 lutin mi engemawzat chu tlanchhuak leh in, tunah hian campers 200 vel an la awm a. Krista Remna Palai Team-te rawih an niin, T. Upa Jerry Laltanpuia chu Speaker a ni.
