Central sawrkar-in Motor vehicle (Ammendment) Act 2019 chu September ni 1, 2022 atanga hman tan tura thuchhuah a rawn siam chungchangah vawiin khan KT Beicho, Secretary, Transport department chuan chanchinthar lakhawmtute a kawm a, “Motor vehicle (Ammendment) Act 2019-a penalties/fines a san em avangin Trasport department chuan he Dan siam thatna kan hman a ngaihna chhan hi mipuite hriatah sawifiah tulin kan hria a, heng hremna (penalties/fines) siam tharte hi a sang deuha hriat a nih avangin Transport department chuan theih tawpin ti hniam turin hma a la a ni,” a ti.
KT Beichho chuan, “State dangte pawhin an buaipui nasa hle a, penalties/fines te tihniam zawngin notification te an lo chhuah a, hetiang a nih avang hian Ministry of Road Transport & Highways chuan Ministry of Law & Justice rawnin, Attorney General of India ngaihdan an la a, Attorney General chuan heti hian a chhang a ni, ‘Motor vehicle (Ammendment) Act, 2019 hi Parliamentary legislation a ni a, State sorkarin hemi zulzui hian Dan hranpa siamin emaw penalties/Fine te hi a ti hniam thiang lo a. Tin, Central sorkarin tih tur a tih hi State-in a ti lo a nih chuan Article 356 of the Constitution of India hi State sorkar chungah lekkawh theih a ni,’ a ti a. Penalties/fines-te hi Central sorkar-in a lo tihsan vek tawh avangin, E-Challan kalpui tur hian kan Dan hman laia penalties/fines te hi a hman theih tawh loh a ni,” a ti.
