Central Young Lai Association, Lawngtlai chuan thuchhuah siamin, “March 22, 2023-a India leh Myanmar border-a misual kut tuara boral – South Lungpher a kan YLA member Pu B. Lalthafamkima leh New Siaha a khawsa Pi Biaksuii leh Pu Bablu, MRHG te thihna hi Central Young Lai Association chuan pawi a tiin, mitthi chhungte zawng zawng kan tawrhpui takzet a. He tualthahnaa rapthlak taka inhnamhnawih zawng zawngte hi kan demin, Mizoram leilung fa ngei te’n hetianga thil duhawm lo ber kan tawk hi kan rilru a na in tun hnuah chuan thleng tawh lo se kan ti takzet a ni,” an ti.
Thuchhuahah chuan, “He thihna rapthlak taka inhnamhnawihte zawnchhuah leh manchhuah kawngah a theih ang angin Central YLA chuan hma a la nghal a. Heng pawikhawihtute hi man an nih vat theihna tur leh Dan anga a na thei ang bera hrem an nih theihna tura tan la chhunzawm zel turin Sawrkar thuneitute pawh kan beisei a. Tin, he thihna chungchanga thuneitute leh Central YLA hmalakna te min thlawp a, a theih ang anga min thawhpui turin Mizoram mipuite leh Mymmar rama kan unau zawng zawngte kan beisei bawk a. A bik Lakin Mymmar buaina avanga zalenna sualtu pawl hrang hrang – CDM, CDF, PDF, CNA adt., zawng zawngte pawh he thihna chungchanga pawikhawihtu leh inhnamhnawih zawng zawngte manchhuah a nih thuai theihna tura hma la turin kan beiseiin kan ngen takzet bawk a ni. Myanmar buaina avanga sahimna beiseia min rawn beltu kan unaute chhawmdawl hna theihtawp chhuaha kan thawh laia hetiang anga thungrulh kan ni hi Central YLA chuan a hrethiam lo takzet a. Hetiang thil hi kan hlauh ruk, thleng lo atana kan duh ngawih ngawih a nih laia kan inunauna tiderthawng zawnga thil a thleng fo mai hi pawi kan ti a. Hetiang ang thil a thlen tawh lohna tura mahni mi leh sa te thunun tur leh khuahlchirh tur pawhin Myanmar lama kan unau zawng zawngte kan beisei a, Central YLA pawhin kan rama rawn raltlante enkawl kawngah chak zawka khualikhirh an nih theihna turin ruahmanna a siam nghal mek bawk a ni. Kan unaute’n an ram buaina avanga an harsatna tawh hi kan hriatthiampui rualin, atun hnai buaina avanga kan ram mipuite an thlabar hi kan phal lova. Tuna thil thleng mg hi a thleng leh a nih chuan kan duh miah loh thil, unau inkara thleng lo tura kan ngaih thil hial a to thleng a nih pawhin min dem lo turin Myanmar lama kan unaute kan chah lawk nghal bawk a ni. Tin, Myanmar ram buaina hi remchanga lo la a, kan ram mipuite zingah hlawkna beiseia dan phal loh thil hrang hrang – Damdawi leh ralthuam tawlhruk etc. a inhnamhnawih lo tur leh hetiang ang thil ti tite thawhpui lo turin mipuite kan inngen nawn leh bawk a ni. Sahimna beiseia rawn raltlan kan unaute himna hi kan duhpui a, tun dinhmuna kan ngaih pawimawh ber erawh kan ram mipuite himna leh damna a ni,” tiin an tarlang bawk.
