Mizote tlawmngai pawl lian ber, Central YMA roreltu, Central Executive Committee (CEC) chuan Ni 8.6.2023 zan dar 7:30 khan Central YMA Committee Room, Tuikhuahtlangah Meeting an nei a. Meeting tan hma hian Project Sub Committee, Central YMA -te hmalakna a siam, *Central YMA Committee Room Thar* chu Pu R. Lalngheta, President in ribbon chep chatin a hawng a. Committee room tharah hian CEC meeting neih chhunzawm nghal a ni.
CEC meeting chuan Ni 2.6.2023 zana emergency meeting in Manipur tualchhung buaina avanga Zohnahthlak raltlan thlenna tur neilo leh belh tur chuang hremiah lo te innghah lailawkna (Transit Camp) atana buatsaih, Central YMA Hall, Tuikhuahtlanga raltlan thlen tawh dan report ngaihthlak niin tun dinhmun (8.6.2023 zan dar 7:00) thlengin Mi – 131 lut tawhin, heta tang hian khawpuichhung Branch YMA thenkhat Vaivakawn, Chanmari, Electric Veng, Tuikhuahtlang, Kulikawn, Hlimen, Tlangnuam leh Thuampui ten mikhual te hi an lo thleng darh ve leh a. Transit camp atanga India ram hmun dang danga kal darh leh engemawzat an awm bawk a, tunah hian transit camp-ah hian mi 24 an la awm a ni.
Hetianga transit camp atanga raltlan lo mikhual Branch YMA te hnenah Central YMA chuan tanpuina pek nise an ti a. Branch YMA raltlan lo mikhual thei te hnenah Central YMA chuan lawmthu sawiin Branch YMA dangte pawh an tlin ang tawk tawka raltlan lo mikhual thei zel turin a ngen zui bawk a ni. Tin, Central YMA chuan Manipur raltlan te nasa taka lo tuamhlawmtu Silchar Branch YMA te chu tanpuina pawisa fai Cheng Nuaih khat pek nise an ti bawk.
Tin, CEC meeting hian Environment humhalh kawngah Centre for Environment and Social Justice ( CESJ) te nen thawhho an remti bawk.
