Tunhnaia Jiribam, Manipur-a CRPF ten Zohnahthlak mi 10 an kahhlum te ruang chu Mizoram kaltlangin an khua Lamka, Manipur-ah phurh chhoh a ni dawn a. Vawiin (13.11.2024) chawhnu lamah hi chuan Silchar atangin Mizoram an rawn phurh chhoh hman beisei a ni a. Nizan khan Silcharah mi 6 postmortem an ni a, chanchin ziah lai vawiin dar 10:00AM khan a dang 4 hi postmortem tura ruahman a ni a, hemi zawh hian Mizoram lam panpui tur a ni a, thudawnna in a tarlan danin a kaltlang tur khaw hrang hrangten an lo hmuah ve dawn avangin Aizawl a lo thlen hun tur a tlai deuh tura ngaih a ni.
Heng mi 10 ruangte hi Aizawl an lo thlen hunah Central YMA chuan AMC Office kawt, Thuampuiah lo hmuah a tum a. Ruang hmuahnaah hian a duh apiang tel turin a sawm a, chanchin hi rawn tarlan zel tum a ni.
––——-–—
1:30 PM : Zo hnam martar 10 te ruang hi tarlan tawh angin Silchar ah mi 6 post-mortem an nih hnu-ah midang 4 te chu post-mortem chhunzawm theih an ni rih lova. Ministry of Home Affairs atangin post-mortem chhunzawm rih lo tura an rawn tih vang niin thudawnna chuan a sawi a ni.
