Central YMA-in anpui kawpte tana chen lailawkna sa lo turin CM ngen

Central YMA chuan anpui kawp (LGBTQI/ Lesbian Gay Bi Sexual Transgender Queer Intersex) te tana chen lailawkna in sak tumna chu an duh loh thu chief minister hnenah an thlen.
Sawrkar laipui ruahmana Mizoram sawrkarin Sakawrtuichhuna anpui kawpte chen lailawkna tur, cheng nuai 35 senga shelter home sak tum hi political party pahnih – AAP Mizoram leh PC party pawhin tha an tih loh thu leh an duh loh thu an sawi tawh a ni.
Vawiin khan Central YMA hruaitute hian chief minister Zoramthanga hmu in thil chi hrang hrang an sawipui a. Mahni anpui kawpte chen lailawkna tur, shelter home sak tumna chu an duh loh thu leh tipuitling lo tura an duh thu leh titawp tura an duh thu an thlen a. Chief minister hian UD&PA changtu deputy chief minister a sawipui tur thu a lo hrilh.
Central YMA hian Myanmar atanga dan loa kuhva ro tawlh chungchang pawh tihtawp a nih theih nan chak zawka hma lak a tul thu chief minister hnenah hian an thlen bawk a. Central YMA rawtna angin December 15 hian kuhva ro tawlh chungchangah a changtu minister leh a kaihhnawih department te nen sawikhawm nise turin ruahmanna siam a ni.
Heng bakah hian Bangladesh atanga Zohnahthlak raltlante chhawmdawl dan tur pawh leh an chen lailawkna tur ngaihtuah sak dan turte an sawipui bawk.