Vawiin tlai dar 3:00 khan Central YMA Ruihhlo Do Pâwl, ‘Central Anti Drugs Squad’ (CADS) 2nd Batch lâkluhna inkhawm Central YMA Hall, Tuikhuahtlâng, Aizawl-ah buatsaih a ni a. CADS 2nd Batch atana hruaitu turte leh Member turte an tel a ni.
He hun hi Lalhmachhuana, Vice President Central YMA chuan a kaihruai a. Ram leh hnam hmangaihna tak nei lo tân chuan ruihhlo do hi thil tih namai lo tak a ni a. Chuvang chuan, Central YMA-in ruihhlo a dona kawnga CADS hmalâknaa tel tur te chuan ram leh hnam hmangaihna thinlung a thara put hmasak a țul a ni, a ti.
R. Lalngheta, President Central YMA chuan, CADS member thar te lawmluhna hun hmangin thu a sawi a. Pathian rawngbâwltute din YMA hi Pathianin a țanpui bâng lo va, kan ram leh hnam tâna ke a penna kawng hrang hrangah Pathian hian a la țanpui zel dawn a ni tih hria in, theihtawp chhuaha kan ram leh hnam damna atana huai tala ke pen turin CADS member thar te a chah a ni.
CADS 2nd Batch Convener tura ruat Fabian Lalfakawma, Treasurer Central YMA pawhin thusawiin a thawhpui turte chu hruaitute kal tlanga Pathian ruatte an nih avangin a phurawm hle a ahriat thu a sawi a. Ram leh Hnam tan chuan tuar a ngaih pawha tuar inhuam tur leh ruihhlo laka kan thalaite chhanchhuak turin kan theih tawp bakah tlem tal chhuah theuh turin a chah bawk.
CADS Member tur hian Aizawl khawpui chhunga Branch YMA za chuang atangin member 1 țheuh branch tinin an ruat a. 1st Batch-ah khan member 54 awmin 2nd Batch-ah hian member 48 an awm ang a, thla hnih (November & December) chhûng atan ruat an ni a. Zanin lam atangin duty an chhunzawm nghal dâwn a ni.
CADS 1st Batch Convener, Roneihthanga, Fin. Secretary Central YMA hnen ațangin September ni 9 ațanga November ni 17, 2022 chhûnga CADS 1st Batch hmalâkna tlângpui report ngaihthlâk a ni a. Hetiang hi an ruihhlo hman zât a ni:-
Heroin (No.4) Hawng 458
TicTac 1006 (Hawng 26 hu)
Meth mum 10153
AP 1205
Tram mum 51200
Pseudo 182grm
Ganja 1kg & 25pack
Cough syrup bur 3010
Ruihhlo-a inhnamhnawih mihring man hi mi 490 an ni a, heng zîngah hian
Police-a pek mi 2
Excise-a pek mi 90
Councelling pek mi 236 an ni. Central YMA Demand Reduction Service (DRS) kaihhruaihna hnuaiah Synod Revival Team-ten councelling hi an pe țhin a ni.
An ruihhlo man zawng zawng hlut zâwng hi ₹28,16,48,256/- (Cheng vaibelchhe sawm hnih pariat, nuai sawm paruk, sing li sang riat za hnih sawm nga paruk) vel a ni.
