Central YMA-in Ruihhlo do beihpui a thlak dawn

Aizawl Aug. 30 : Nizana Central YMA Central Executive Committee CEC vawi 16-na thukhawm chuan ruihhlo a bika dotu pawl Central Anti Drugs Squad CADS din a remti.
Central YMA CEC thutkhawm ah hian Ruihhlo in kan ram min run mekna te thlir chungin Central YMA hnuai ah ruihhlo do pawl – Central Anti Drugs Squad din leh chu tul a ti a, CADS dinthar leh hi Sept 9, 2022 Zirtawpni ah memberte lawmna leh hlanna hun hman a ni ang. CADS term hi thla hnih chhung zel ni tura ruahman ni in, member 50 zel an awm ang. Sept – Oct, 2022 chhunga hruaitu atan Convener : Roneihthanga Fin. Secretary, Central YMA Asst. Convener : K. Darthantluanga, CEC Secretary : Lalsâwma Ralte, CEC Asst. Secretary : R. Lalchhandama, CEC. CADS Member turin Aizawl khawpui chhunga Branch YMA 108 atangin mi 1 theuh ruattura beisei an ni.
CEC thukhawm chuan YMA Dan Bu hman mek chu Rorel Inkhawm Vawi 3-na, October Ni 27, 2022-a Thingsulthliah playground a neih turah ennawn a ni dâwn a, Dan Bu ennawn ngai laite lo thlifim tura ruat Dan Bu Ennnawn Committee tena an ruahmanna chu thlir ho a ni dawn bawk. Heng bakah hian Central YMA CEC thutkhawm ah hian Hnam dang dan lova sumdawngte dapchhuah kawngah chak zawka hmalak zui zel dan tur ngaihtuah a ni a. Central YMA Kumpuan Sub Committee tena hma an lo lak tawh dan chu tha tih a ni a. Hmalak zel dan tur duangin Sawrkar hmalak mekna ngaihchan remtih a ni bawk.