Tunhnaia ruah súr nasat avanga Silchar leh a chhehvela tuilianin nasa taka harsatna a thlen mekah, Silchar-a Mizo ten engemaw zat chu tuilian in a dang bet a, eitur pawh tlachham tawh, chesawn thei tawh lo an awm teuh thu chu Ni 21.6.2022 (Tue.) zan dar 10:00 vel khan Silchar Branch YMA President in Central YMA hruaitute hnena a rawn thlen chu Central YMA hruaituten hmalak dan tur ngaihtuah nghalin Nilaini khan Sawrkar lam hotute hnenah thlen nghalin hmalak nghal a ni a. Sawrkar in Lawngleng engine nei pahnih Bairabi a mi phur in Silchar lam an panpui nghal a. CYMA pawh in an mamawh an rawn sawi angin Life Jacket 15 a thawn thla nghal bawk.
Ni 23.6.2022 khan Central YMA chuan Mizo unaute Silchar-a tuilian tuar mek te ei leh in bakah an mamawh a hman atan, tun hnaiah thli leh ruah tuarte tanpuina YMA Member tena an thawhkhawm atangin sumfai Rs.25,000/- (Sínghnih sang nga) chu Silchar Branch hruaitute hnenah a thawn leh nghal bawk a ni.
Tuilian tuar mangangte tana Silchar Branch YMA hruaitute leh member-te in pekna leh thawhrimna fakawm an tih thu Central YMA hruaitute chuan an sawi bawk a ni.
Hriattheih chinah tun thlengin mi 33 Silchar Mission Compound-ah him takin an thlen tawh a. Heti hian Mizo tangkhang an awm tawh lo nia sawi a ni a. Heng mi 33 zinga mi 16 te hi Mizoram lamah hruai haw mek an ni.
