Central YMA chuan vawiin 22.4.2023 (Zirtawpni) khan mahni sahimna zawng a Burma atanga rawn tlan Zokhawthar camp a awm ho te a tlawh a. CYMA te hi President R. Lalngheta hovin, CEC member thahnem tak an kal a, Sub Hqrs YMA Champhai hruaitute, Tuipuiral Group YMA leh Vanhnuailiana Group YMA hruaituten an tawiawm a ni.
Zokhawthar khawtlang hruaitute nen inkawmhona neih a ni a, inkawmhona hi Lalmuanpuia Zokhawthar VCP in a kaihhruai a. Inkawmhona a thusawitu CYMA President R. Lalngheta chuan, “Zokhawthar a Myanmar atanga rawn raltlan te dinhmun chiang tak hi hriat kan duh avangin a hmun ngei ah kan lo kal a. Raltlan awm rei tawh leh awm nghet deuh te hu chu ei leh in anmahni a, an indap tir dan hi kan zawn ho a tha khawp mai. Raltlan an lo pung zel a tanpuitu an tlem tial tial a, tan lehzual a ngai dawn khawp mai. Kan unaute an ni a, kan unau ten min rawn bel a nih chuan kan hnar tur a ni lo a, kan theih ang angin kan lo tuamhlawm tur a ni.”a ti
Zokhawthar ah hian tun dinhmun ah raltlan hi 5604 an awm mek a, Zokhawthar field ah an chenna in tur siamsak an ni a, an len loh avangin hmun danga sawn tum an ni a, a sawnna tur in pawh sak mek a ni. Zokhawthar ah hian raltlan an thahnem hle a, harsatna chi hrang hrang an tawk mek a ni.
