Vawiin chawhma dar 10:30 khan Cultural Centre Bawngkawn South-ah Central YMA leh Mizoram PWD te thawhhona thuthlung (MoU) sawihona hun hman a ni a. Central YMA O.B, CEC, Sub-Hqrs YMA, Group YMA leh Aizawl khawpui chhung Branch YMA âiawhte an kal khawm a. Mizoram PWD ațangin Engineer-in-Chief Er. Bowman, Er. Lalrinkima Hnamte, Chief Engineer (P) bâkah SDO chin chinglam an kal khawm bawk a ni.
Chawhma hun hi PWD E-in-C Er. Bowman chuan kaihruaiin, R. Lalngheta, President nen kalkhawmte lawmna hun an hmang. Pu Roneihthanga, Fin. Secy Central YMA chuan hunserh a hmang a, Er. Lalrinkima Hnamte, Chief Engineer (P) chuan PWD ațanga kal te inhmelhriattirna hun a hmang a. Prof. Lalnuntluanga, General Secretary Central YMA chuan YMA lam ațanga kal te inhmelhriattirna hun hmangin, Central YMA leh Mizoram PWD te’n thawhhona thuthlung (MoU) an ziah dan chungchâng report a pe nghal bawk.
Chawhnu hun hi R. Lalngheta, President Central YMA chuan a kaihruai a. Chawhma leh chawhnu hunah hian zawhna leh chhanna hun thawl taka hman a ni a. Sub-Hqrs leh Group YMA hruaituten an huamchhunga inkalpawhna kawnga harsatna hrang hrang an tawh dan te an sawi a. Hma lak mekna leh hma lak tum a nih leh nih loh te zawtin, Er. Bowman E-in-C leh a huamchhunga thawktu SDO ten an lo chhâng țhin a ni.
Kum 2017 Oct. Ni 17-19 chhunga Champhai Zotlanga, YMA General Conference Rorela khawmpui palai tena lungrual taka an lo passed “Mizoram hmun hrang hrang a inkalpawhna kan neihte hi tun aia tha leh changtlung zawka siam a nih theih nan Central YMA-in hma la rawh se” tih chu Central YMA in a bawhzuinaah Mizoram PWD te leh Central YMA te chuan hemi kawnga hmalak ho ṭha an tih angin
Ni 14.6.2018 khan Chief Minister’s Conference Hall, CMO Office-ah Thawhhona Thuthlung ziah a lo ni tawh a.
Thawhhona Thuthlung angin Mizoram chhunga khaw hrang hrangte inkalpawhna tur kawng siam leh thawm ṭhat kawngah te, a siam tute tana harsatna awm thei sutkian dan tur kawngahte, kawng siam vil kawngah te kawng hrang hranga thawh ho zel a ni a.
MPWD hotute leh Central YMA mai bakah Central YMA hnuaia Sub Hqtr. YMA, Group YMA leh Branch YMA hruaituten thawhhona thuthlung anga an hna thawhte sawi ho leh thlirletin vawi engemaw zat in kawm hona hunte siam a lo ni tawh bawk. Tunhnaiah he thawhhona hi kum thum (3years) atan ziah belh leh nise tih a nih angin Ni 14.7.2022 khan MPWD Conference Hall-ah MPWD leh YMA te chuan Kum 3 chhung atan thawhhona thuthlung hi an ziak leh a ni.
