Chhiat tawk chhungte, hmun hla zawka awmte’n loh theihlohna avanga ruang an hmuh hmaa thlah liam ngai thin tih tlem leh tihziaawm beisei a ni Vawiin (September 16, Zirtawpni) khan YMA Chaltlang Branch-in a kum 75 tlin lawm nan ruang vawn thatna (refrigerated mortuary) Bialtu MLA Vanlalhlana’n Chaltlang Thlanmualah a hawng. He ruang vawn thatna hmang hian chhiat tawk chhungte, hmun hla zawka awmte’n loh theihlohna avanga ruang an hmuh hmaa thlah liam ngai thin tih tlem leh tihziaawm beisei niin, Branch YMA chuan chhiatni inkaihhruaina hemi zul hian a siamrem nghal bawk a ni.
Chhiat tawk an awm chang a mitthi chhungte a tuk mai a lo thleng a, lung dam tak a inthlah thei mai turte ruang vawnthatna neih loh avanga lung dam lo tak a invui liam zung zung nghal thin hi Chaltlang Branch YMA chuan engti zawng emaw taka her danglam duhna a nei thin a. Kumina Branch YMA kum 75-na lawm kal mekah lawmna chi khat atan thil la awm ngailo leh tangkai tur eng emaw tak neih duhna a awm a, Branch Executive Committee in uluk taka a ngaihtuah hnuah a tul leh mamawh chang a hman tur atan ruang vawnthatna neih ni se ti in a rel ta a. Hruaitute’n India ram hmun hrang hrang a hetiang lam siam thin Company te bia in ‘quotation’ a la khawm a, ngun takin a senso turte a zir chiang a, ruang pahnih dahthatna chu YMA enkawl atan tawk a hria in ‘2 Bodies Refrigerated Chamber’ chu lei turin a thlang fel ta a. Company hrang hrang paruk zing a\angin a man, transportation, after sales service tha ber a a hriat avangin Eskay Refrigeration, Guwahati chu than a ni ta a ni. Ruang vawhthatna hawn thar hi feet 7 a sei niin ruang vawnna hmun hi inches 30-a zau, inches 49 a sang ni a. Ruang vawnna hmun hi 2-5℃ a vawt niin, a man chu cheng 1,94,700/- a ni (discount cheng 4,700/-). Chaltlang Branch YMA in mortuary neih theih nana senso tur a ngaihtuah laiin Pu Vanlalhlana, Aizawl North 1 Bialtu MLA chuan Platinum Jubilee lawmna thilpek atan a man tur cheng 2,00,000/- lai mai a MLA Fund atangin min tum sak a.
Tin, Mortuary Cabinet dahna tur pindan siam nan Pu Vanlalngaihsaka (IAS) te chhungin an fanu NI. Vanlalchhandami (L) hriatrengna turin cheng 70,000/- an rawn tum bawk a. An chungah Chaltlang Branch YMA chuan lawmthu a sawi tak meuh a ni. Mortuary hawn a nih dawn takah chuan YMA Chaltlang Branch Executive Committee-in September 10 khan a human dan tur a rel nghal a. Vengchhungah mitthi lumenpui ngai rimchhe tawh, ruang kil hrehawm tawh (ruang chhe tawh, vui nghal ngai ang chi huam lo vin) an awmin emaw, mitthi chhungte nghah rei ngai an awmin emaw, a thlawnin hman theih a ni ang a, nizan thum bak dah phal a ni lo thung ang a. Vengchhunga hnamdang thi pawh a tul dan angin dah thin a ni ang a, inphumlo chi an nih chuan, mortuary a\angin an inhalna tur lamah inphurh nghal mai tur a ni ang a, vengchhunga awm hnamdangin veng dang a an chhungte ruang hlawm/lalut a an ruang lumenpui ngai an awm pawhin man chawia hman phalsak a rel bawk.
Veng pawn atanga ruang dah pawh phal niin, Branch Executive Committee chuan dilna thlente chu dilna an thlen hmasa tur a ni, an dilna rem tihsak hnuah chuah man chawiin an dah thei ang a. Vengpawn mite pawhin an hmang duh a nih chuan mortuary hman ziakin an dil thei ang a, zan khat/ni khat dah man Rs. 2,000/- bituk a ni a, a aia rei an dah chuan zan khat/nikhat ah Rs.1000/- zel chawi belh tur a ni ang a, zan/ni thum bak indah hi phal a nilo ang, tiin a rel bawk. Hetih lai hian vawikhatah ruang pakhat bak dah remtih a nilo ang, ruang dahna pakhat zawk chu veng chhung mite tan hauh a awm reng tur a ni. Tual thi/ruang chhar Police te kut a lut tawhte chu dah phal a ni lo thung ang. Chaltlang Branch YMA hian mitthi sawngbawl kawngah tun hma pawhin hmalakna danglam a lo nei tawh \hin a. Thlanmual indaihlohna chhawk zangkhai turin kum 2020 February thla khan thlan chhawrdawh, ruang rawlh luh mai theihna hawn a lo ni tawh bawk a ni.
