Champhai Leilet leh a chhehvel humhalhna dan siam tum a ni

Aizawl, June 20 : Land Revenue & Settlement Minister Lalruatkima leh EF&CC Minister TJ Lalnuntluanga hovin Agriculture Department hotute leh Land Revenue & Settlement Department hotute nen Champhai District chhunga WRC ram (Champhai Leilet Area) humhalh chungchang ngaihtuah leh sawiho a ni a.
Vawiina Revenue Minister Lalruatkima pisa a thutkhawm ah hian thutkhawm hmasa lamin a lo rel tawh angin, Champhai Leilet Area hi a hmuna enfiah tawh a ni a, Enfiahna ah hian Director, Land Revenue & Settlement Deptt. chu Convener niin, Agriculture lama thawktute leh NGO Coordination Committee te leh Nature Conservancy aiawhte pawh an tel bawk a ni.
He Spot Verification/Enfiahna Report hi nimin thuthkhawmna ah hian zirho leh niin, Champhai Leilet Area hi Special Economic Zone (SEZ) a puan tura ruahman nise tih a ni a, nikum (2021) July khan Land Revenue & Settlement chuan Champhai Leilet Area chhunga Agriculture lam hmalakna nilo chu engmah hmalakna dang kalpui phal a nih loh thu pawh Order hmangin a lo chhuah tawh bawk a ni. Champhai Leilet Area hi 606.66 Hactare a zau a ni. Helai Leilet Area chhunga Pass lo neisa te chu an Pass neih mila siamrem sak tum a ni bawk.
Sawrkarin heti zawnga hmalakna a kalpui chhan chu, Champhai Leilet Area chhungah insak leh thil dang atana hmalakna, Sawrkar phalna ni si lova kalpui a tam bakah, Lo neia eizawngtute hma khua ngaih vang liau liau a ni a, hetia hmalak a nih loh chuan nakin zelah Loneitute tan eizawnna tur hmun hma a awm loh a hlauhthawn vang a ni. He WRC humhalh chungchang hi Minister pahnih te kaihhruaiin vawi engemaw zat sawiho a lo ni tawh a ni.