Champhai, April 4 : March ni 21, 2022 zana Champhai Kahrawt Veng Thlerpuia inkang tuartute tana Champhai Officers’ Club (COC) member-te atanga tanpuina pawisafai thawh tlingkhawm, Rs.1,20,000 (cheng nuaikhat leh singhnih) chu kang tuar chhungkaw 9 te hnenah vawiin tlai dar 4 khan hlan a ni.
Tanpuina hlanna hun Pu K.Lalbiakkunga In, Kahrawt Thlerpuia neihah hian COC President Pu P. Lalhmingliana chuan kangmei chhuak tuarte Champhai Officers’ Club in thinlung taka a tawrhpui thu a sawi a. Kangmei tuarte tana inphal taka tanpui duhna thinlung pu a pawisa thawhtute fakawm a tih thu sawiin, Champhai Officers’ Club chuan a thiltum, ‘Mipuite rawngbawl sak’ tih chu vawngnungin tanpui ngaite tanpui kawngah a penchhuah fo thin a ni, a ti bawk.
He hun hi COC Secretary Dr. Lallawmkima chuan a kaihruai a. Kang tuarte hnen atangin thusawi ngaihthlak a ni a. COC aiawhin Pi R. Lalnunkimi, Treasurer leh Pu C.Lalthazuala, Asst. Secretary te an tel bawk.
Champhai Officers Club hi kum 1992 a din niin, tun dinhmunah member 111 an awm mek a. Champhai Officers’ Club hian pawl member-te sum thawhkhawm kaltlangin mamawhtu leh tanpui ngaite puiin an lo fehchhuak fo tawh thin a ni.
