Republic Veng Branch YMA chuan ni 30, April 2024 zan khan YMA Kumpuan “Ram leh hnam humhalh” hawnna hun an hmang a, Central YMA Vice President Prof. Lalnuntluanga chuan a hawng a ni. Kumpuan hawnna hunah hian Republic Veng chhunga chawimawi phu chawimawina hun an hmang nghal a ni.
YMA Kumpuan “Ram leh hnam humhalh” hawngtu Prof. Lalnuntluanga chuan, “Ram leh hnam humhalh hi tum 15 YMA in kumpuanah kan nei ta a, kan ramin a mamawh hle a ni ang. Tunah hian kan ram hian eng dinhmuna nge a din tih hi kan chhut a pawimawh, Mizoram hi Pathianin kan chenna atana min pek a ni a, hei lo ram kan nei lo a ni. Vawiina kan ram dinhmun en hian Hospital a admit ngai kan ni em? ICU dah ngai kan ni tawh zawk em? tih hi kan chhut ngun a ngai a ni. Kan Zoram natna laka ta ti dam thei tu chu YMA memberte kan ni a, kan ram leh hnam humhalh tur hian theihtawp kan chhuah a hun tawh takzet a ni, ” a ti.
Prof. Lalnuntluanga chuan, “In hmun lo ram hralh leh lei chungchangah Mizoram chhungah hnamdang ten dikna an nei lova chanvo an nei lova, sumdawnna chungchangah pawh Tribal ni lo tan chuan phalna a neih theih loh a ni. Amaherawh chu tuna Mizoram dinhmuna chuan a taka neitu hnamdang ni si Mizo sumdawng kan thahnem ta hle mai. In hmun hralh chungchangah pawh a lei tu Mizo ni si a taka neitu hnamdang ni ta an thahnem hle a ni. Hetiang ang hnamdang kawppui thin tute hi hnam phatsan tu an ni. Aizawl khawpui chhungah hnamdang dawr a tam em em a, a nei tu hnamdang, a hming tumtu erawh Mizo ni si an thahnem hle a ni. CYMA in Aizawl khawpui chhung cement leh Iron Rod dawr a zirchiannaah pawh za a sawmkua (90 percent) zet chu a hming tumtu Mizo ni si, a hlawkna tel tak tak tu hnamdang an ni. Sumdawnna chungchangah pawh YMA member ten ngaihtuahna thar kan sen a ngai ta a ni. Kan ram leh hnam humhalh tur hian i tangrual zel ang u,” a ti bawk.
Republic Veng Branch YMA te hian an veng chhunga chawimawi phu chawimawina an nei nghal a, chungte chu:
1. MPSC Combined Competitive Exam 2023-a MCS topper – Lalnunpuia Renthlei
2. Book of the year 2023 ziaktu – K. Vanlalhmangaihi
3. Miss Mizoram 2024 – Jennifer Lalrinzuali Renthlei
4. Dr. Lalhriatpuii, Ph.d
5. 29 MIMSA Racing champion – Lalramdina
